କଣ୍ଟାମାଳ,୧୩/୯- ବୌଦ୍ଧଜିଲ୍ଲା କଣ୍ଟାମାଳ ବ୍ଲକରେ କାର୍ଯ୍ୟରତ ଆବାସ ଯୋଜନାର ବ୍ଲକ କୋର୍ଡିନେଟର ଠାକୁର ବେହେରା ନିଜ ସରକାରୀ କ୍ୱାଟରରେ ଗାମୁଛା ଲଗାଇ ଆତ୍ମହତ୍ୟା କରିଥିବା ଜଣାଯାଇଛି । ସୂଚନାପ୍ରକାରେ ଗତକାଲି ରାତିରେ ନିଜ କ୍ୱାଟରରେ ଏକୁଟିଆ ଶୋଇଥିବାବେଳେ ଆଜି ଦିନ ୧୧ଟା ପର୍ଯନ୍ତ ଅଫିସ ନଆସିବାରୁ ବ୍ଲକ ବିଡ଼ିଓ ନିଜ କର୍ମଚାରୀଙ୍କ ହାତରେ ଡକାଇ ପଠାଇଥିଲେ । ବାରମ୍ବାର ଡାକିବା ସତ୍ତେ୍ୱ କବାଟ ନଖୋଲିବାରୁ କବାଟ ଭାଙ୍ଗି ଦେଖିବାରୁ ଠାକୁର ବେହେରାଙ୍କ ଝୁଲନ୍ତା ଦେହ ଦେଖିବାକୁ ମିଳିଥିଲା । ଗତ ଶନିବାର ଦିନ ସ୍ୱର୍ଗତ ବେହେରା ନିଜ ସ୍ତ୍ରୀ, ପୁଅ, ଝିଅକୁ ନିଜ ଗାଁ ଜହ୍ନାପଙ୍କ ନିକଟ ପୋଡାବଳସକୁ ନେଇ ଛାଡି ଗତକାଲି ଫେରିଥିଲେ । ଖବରପାଇ କଣ୍ଟାମାଳ ପୋଲିସ ଘଟଣା ସ୍ଥଳରେ ପହଞ୍ଚି ଶବ ଜବତ ସହ ଆତ୍ମହତ୍ୟାର କାରଣ ପାଇଁ ପଚରା ଉଚରା କରିବ ବୋଲି କହିଛି । ବ୍ଲକ ସରକାରୀ କଲୋନୀ ଭିତରେ ଏଭଳି ଏକ ଆତ୍ମହତ୍ୟାକୁ ନେଇ କଲୋନୀ ଭିତରେ ଭୟର ବାତାବରଣ ଦେଖାଯାଇଛି । ସ୍ୱର୍ଗତ ଠାକୁର ବେହେରାଙ୍କ ମୃତ୍ୟୁକୁ ନେଇ କଣ୍ଟାମାଳ ବିଡ଼ିଓ କଳାକୃଷ୍ଣ ପ୍ରଧାନ ଗଭୀର ଦୁଃଖ ପ୍ରକାଶ କରିବାସହ ଏଭଳି ପଦକ୍ଷେପକୁ ନିନ୍ଦା କରିଛନ୍ତି ।
