ଦଶପଲ୍ଲା : ଶରତ ଋତୁର ଶେଷବେଳକୁ ଭିଜା ଭିଜା କାକର ସହିତ ଅଳ୍ପ ଅଳ୍ପ ଶୀତ ଅନୁଭୂତ ହେଉଥିବାବେଳେ ଦଶପଲ୍ଲା ନିର୍ବାଚନ ମଣ୍ଡଳୀରେ ଆସନ୍ତା ୨୦୨୪ର ନିର୍ବାଚନୀ ଉଷ୍ମତା ୨୦୨୨ରୁ ଅନୁଭୂତ ହେଲାଣି । ରାଜନୀତିର ଘୋଡା, କେତେବେଳେ କେଉଁ ଆଡେ ଦଉଡୁଛି ତାହା ସାଧାରଣ ଲୋକଙ୍କ ପାଇଁ ଅବୁଝା ରହିଯାଉଛି । ଏମିତି ଏକ ରାଜନୈତିକ ପଟ୍ଟ ପରିବର୍ତ୍ତନ ହୋଇଛି ଦଶପଲ୍ଲା ଏନ୍ଏସିରେ । ନୟାଗଡ଼ ଜିଲ୍ଲା ଦଶପଲ୍ଲା ଏନଏସି ଉପାଧ୍ୟକ୍ଷ କିଶୋର ଚନ୍ଦ୍ର ଦାଶ ବିଜେଡି ଛାଡ଼ିଛନ୍ତି । ଏନେଇ ଶ୍ରୀ ଦାଶ ଚିଠି ଯୋଗେ ଦଶପଲ୍ଲା ବିଧାୟକ ତଥା ଜିଲ୍ଲା ବିଜେଡି ସଭାପତି ରମେଶ ଚନ୍ଦ୍ର ବେହେରାଙ୍କୁ ଅବଗତ କରିଛନ୍ତି । ସ୍ୱାସ୍ଥ୍ୟଗତ ସମସ୍ୟା ଦେଖାଇ ସେ ଇସ୍ତଫା ଦେଇଥିବା ବେଳେ ବିଜେଡିରେ ସକ୍ରିୟ ସଦସ୍ୟ ଭାବେ ଆଜି ପର୍ଯ୍ୟନ୍ତ କାର୍ଯ୍ୟ କରି ଆସୁଥିଲେ ବୋଲି ଉଲ୍ଲେଖ କରିଛନ୍ତି । ଶ୍ରୀଯୁକ୍ତ ଦାଶ ଗତ ଏନଏସି ନିର୍ବାଚନରେ ବିଜେଡି ଟିକେଟ ନପାଇ ୧୪ ନଂ ୱାର୍ଡ଼ରୁ ସ୍ୱାଧିନ ପ୍ରାର୍ଥୀ ଭାବେ ନାମାଙ୍କନ କରିବା ସହ ବିଜୟ ଲାଭ କରିଥିଲେ । ପରବର୍ତ୍ତୀ ସମୟରେ ବିଜେଡି ପାଖରେ ଆବଶ୍ୟକୀୟ କୁହୁକ ସଂଖ୍ୟା ନଥିବାରୁ ଶ୍ରୀଯୁକ୍ତ ଦାଶଙ୍କୁ ବିଜେଡି ଉପାଧ୍ୟକ୍ଷ ଭାବେ ସମର୍ଥନ ଦେବାକୁ ବାଧ୍ୟ ହୋଇଥିଲା । ମାତ୍ର ଅଳ୍ପ କିଛିଦିନ ପରେ ଶ୍ରୀ ଦାଶ୍ ଦଳ ଛାଡିଥିବାରୁ ସର୍ବ ସାଧାରଣରେ ଭିନ୍ନ ଆଲୋଚନା ହେଉଥିବା ଶୁଣିବାକୁ ମିଳୁଛି ।
