ହରଭଙ୍ଗା: ଘରେ ବଢିଲା ତିନି ତିନିଟା ପୁଅ, ସ୍ୱାମୀ,ଶଶୁର, ପରିବାର ଛାଡି ଜଣେ ସ୍ତ୍ରୀ ଘର ଛାଡି ଚାଲିଯିବା ଘଟଣା ଅଂଚଳ ରେ ଚର୍ଚ୍ଚାର ବିଷୟ ହୋଇଛି । ଏନେଇ ନିଖୋଜ ସ୍ତ୍ରୀର ସ୍ୱାମୀ ସ୍ଥାନୀୟ ଥାନାରେ ଲିଖିତ ଅଭିଯୋଗ କରିଥିବା ଜଣାପଡିଛି । ଏଭଳି ଘଟଣା ଦେଖିବାକୁ ମିଳିଛି ବୌଦ୍ଧ ଜିଲ୍ଲା ହରଭଙ୍ଗା ଥାନା ଶଙ୍କରଡ଼ା ଗ୍ରାମରେ । ଥାନାରେ ହୋଇଥିବା ଅଭିଯୋଗ ଅନୁଯାୟୀ ଗତ ୯ ତାରିଖରେ ଅଭୟ କମ୍ପର ସ୍ତ୍ରୀ ଅନିତା କମ୍ପ ପରିବାରଙ୍କୁ କୃଷକ କାର୍ଡ କରି ଯାଉଛି କହି ନିକଟସ୍ତ ଛତ୍ରଙ୍ଗ ବଜାରକୁ ଯାଇ ଆଉ ଘରକୁ ଫେରି ନଥିଲେ । ପରେ ପରିବାର ଲୋକ ଅନିତାକୁ ଖୋଜାଖୋଜି କରିଥିଲେ ମଧ୍ୟ କୌଣସି ପତ୍ତା ମିଳିନଥିଲା । ଏନେଇ ଅଭୟ କମ୍ପ ଆଉ ଝିଅ ଘର ପକ୍ଷରୁ ମିଳିତ ଭାବେ ହରଭଙ୍ଗା ଥାନାରେ ଲିଖିତ ଅଭିଯୋଗ କରିଥିଲେ । କିନ୍ତୁ ଅଭିଯୋଗର ଆଜକୁ ୭ ଦିନ ବିତିଯାଇଥିଲେ ମଧ୍ୟ ପୋଲିସ ପାଖରେ କୌଣସି ସୂଚନା ନଥିବା ବେଳେ ଦିନକୁ ଦିନ ତଦନ୍ତରେ ଶିଥିଳତା ହେଉଥିବା ନେଇ ପୋଲିସର କାର୍ଯ୍ୟ ପ୍ରତି ପରିବାର ଲୋକ ଅସନ୍ତୋଷ ପ୍ରକଶ କରିଛନ୍ତି । ଏପରିକି ଉକ୍ତ ଘଟଣାର ଉଚିତ ତଦନ୍ତ ପାଇଁ ଆଗାମୀ ଦିନରେ ଉପରିସ୍ଥ ପୋଲିସ ଅଧିକାରୀଙ୍କ ଠାରେ ଫେରାଦ ହେବୁ ବୋଲି ଚେତାବନୀ ଦେଇଛନ୍ତି । ଏନେଇ ହରଭଙ୍ଗା ଥାନା ଅଧିକାରୀ ପୁଷ୍ପଲତା ରାୟଙ୍କୁ ପଚାରିବାରୁ ନିଖୋଜ ଥିବା ସ୍ତ୍ରୀର ସ୍ୱାମୀ ଆମକୁ ଏକ ଲିଖିତ ଅଭିଯୋଗ କରିଛନ୍ତି । ଆମେ ଅଭିଯୋଗକୁ ଭିତ୍ତି କରି ତଦନ୍ତ ପ୍ରକ୍ରିୟା ଚାଲୁ ରଖିବା ସହ ଅନିତା ବ୍ୟବହାର କରୁଥିବା ମୋବାଇଲର ନମ୍ବରକୁ ଟ୍ରାକ ପାଇଁ ଦେଉଛୁ । ରିପୋର୍ଟ ଆସିଲେ ତଦନ୍ତ ପକ୍ରିୟା ସୁଦୃଢ ହେବ ବୋଲି ଥାନା ଅଧିକାରୀ ରାୟ କହିଥିବା ଜଣାପଡିଛି ।
