ଫୁଲବାଣୀ,୨୨/୧୦ :- କନ୍ଧମାଳ ଜିଲ୍ଲା ଫୁଲବାଣୀ ସ୍ଥିତ ରିଜର୍ଭ ପୋଲିସ ପଡିଆଠାରେ ସହିଦ ଯବାନଙ୍କର ସ୍ମୃତି ଉଦ୍ଦେଶ୍ୟରେ କନ୍ଧମାଳ ଜିଲ୍ଲା ଆରକ୍ଷୀ ଅଧିକ୍ଷକ ଭିନୀତ ଅଗ୍ରୱାଲଙ୍କର ଅଧ୍ୟକ୍ଷତାରେ ୬୩ ତମ ସହିଦ ସ୍ମୃତି ଦିବସ ପାଳିତ ହୋଇଯାଇଛି । ଏଥିରେ ଅତିଥି ଭାବେ କନ୍ଧମାଳ ଜିଲ୍ଲାପାଳ ଆଶିଷ ଈଶ୍ୱର ପାଟିଲ ଯୋଗ ଦେଇ ସହିଦ ଯବାନଙ୍କର ସ୍ମୃତି ସ୍ତମ୍ଭରେ ପୁଷ୍ପଗୁଚ୍ଛ ପ୍ରଦାନ କରି ସହିତ ସହିଦ ମାନଙ୍କର ତ୍ୟାଗ ସମର୍ପଣ ବଳିଦାନକୁ ସମ୍ମାନ ପ୍ରଦର୍ଶନ କରିଥଲେ । ସହିଦ ସ୍ମୃତି ଉତ୍ସବର ଅଧ୍ୟକ୍ଷ ଶ୍ରୀ ଅଗ୍ରୱାଲ ମଧ୍ୟ ଦେଶ ରାଜ୍ୟ ଉଦ୍ଦେଶ୍ୟରେ ନିଜ ଜୀବନକୁ ଉତ୍ସର୍ଗ କରିଥିବା ସହିଦ ଯବାନ ମାନଙ୍କର ସହିଦ ସ୍ତମ୍ଭରେ ପୁଷ୍ପଗୁଚ୍ଛ ପ୍ରଦାନ କରି ସମ୍ମାନ ପ୍ରଦର୍ଶନ କରିଥିଲେ । ଏହି ଅବସରରେ ମୁଖ୍ୟଅତିଥି ଜିଲ୍ଲାପାଳ ଶ୍ରୀ ପାଟିଲ ଓ ଆରକ୍ଷୀ ଅଧୀକ୍ଷକ ଶ୍ରୀ ଅଗ୍ରୱାଲ ସହିଦ ପରିବାରଙ୍କୁ ଉପଢୌକନ ଦେଇ ସମ୍ବର୍ଦ୍ଧିତ କରିଥିଲେ । ପୋଲିସ ବାହୀନୀ ତରଫରୁ ରିଜର୍ଭ ପୋଲିସ ଇନିସପେକ୍ଟର ପ୍ୟାରେଡ଼ କମାଣ୍ଡର ଧର୍ମେନ୍ଦ୍ର ପ୍ରଧାନ ଓ ସେକେଣ୍ଡ କମାଣ୍ଡର ସରଜେଣ୍ଟ ସରୋଜ କୁମାର ବେହେରାଙ୍କର ନେତୃତ୍ୱରେ ପ୍ୟାରେଡ଼ କରାଯାଇଥିବା ବେଳେ ସହିଦ ସୁନାସିର ମହାନ୍ତି, ଉମାକାନ୍ତ ଜାନୀ, ଏସ କେ ଲେଙ୍କାଙ୍କର ସ୍ମୃତି ଉଦ୍ଦେଶ୍ୟରେ ରାଷ୍ଟ୍ର ସମ୍ମାନ ତୋପସଲାମୀ ଦିଆଯାଇଥିଲା । ଉକ୍ତ ସ୍ମୃତି ଉତ୍ସବ ଦିବସ ପାଳନ ଅବସରରେ ସ୍ଥାନୀୟ ପୋଲିସ ମେଡ଼ିକାଲ ପରିସର ମଧ୍ୟରେ ଏକ ସ୍ୱେଚ୍ଛାକୃତ ରକ୍ତଦାନ ଶିବିର ଅନୁଷ୍ଠିତ ହୋଇଥିଲା । ଏଥିସହିତ ରିଜର୍ଭ ପୋଲିସ ପଡିଆ ଠାରେ ସହିଦ ମାନଙ୍କ ସ୍ମୃତିରେ କ୍ରିକେଟ ଟୁର୍ଣ୍ଣାମେଣ୍ଟ ଅନୁଷ୍ଠିତ ହୋଇଥିଲା ।
