ପାରଳାଖେମୁଣ୍ଡି : ଗଜପତି ଜିଲ୍ଲା କାଶୀ ନଗର ବ୍ଳକର କାଶୀନଗରଠାରେ ଥିବା ସ୍ୱାସ୍ଥ୍ୟ ବିଳାସ ଫାର୍ମାସୀ ଆନୁକୂଲ୍ୟରେ ଭଗବାନ ଧନନ୍ତ୍ୱରୀ ଜୟନ୍ତୀ ପାଳିତ ହୋଇଯାଇଛି । ଏହି କାର୍ଯ୍ୟକ୍ରମରେ ଉପାନ୍ତ ପ୍ରହରି ପୂର୍ଣ୍ଣଚନ୍ଦ୍ର ମହାପାତ୍ର ସଭାପତିତ୍ୱ କରିଥିବାବେଳେ କାଶୀନଗର ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରର ଡକ୍ଟର ସୌମ୍ୟରଞ୍ଜନ ଦାଶ ମୁଖ୍ୟ ଅତିଥି ଭାବେ ଯୋଗ ଦେଇଥିଲେ । ଫର୍ମାସୀ କଲେଜର ଅଧ୍ୟକ୍ଷ ଡକ୍ଟର ସଚିନନ୍ଦନ ଦାଶ ମୁଖ୍ୟ ବକ୍ତା ଭାବେ ଯୋଗ ଦେଇଥିବା ବେଳେ ବରିଷ୍ଠ ସାମ୍ବାଦିକ ହୃଷିକେଶ ଗୌଡ଼ ସମ୍ମାନୀତ ଅତିଥି ଭାବେ ଯୋଗ ଦେଇଥିଲେ । ପୂର୍ଣ୍ଣଚନ୍ଦ୍ର ପାତ୍ରଙ୍କ ଦ୍ୱାରା ଅତିଥି ପରିଚୟ ପରେ ସଭାପତି ପୂର୍ଣ୍ଣଚନ୍ଦ୍ର ମହାପାତ୍ର ପ୍ରଦୀପ ପ୍ରଜ୍ୱଳନ କରି ଏହି କାର୍ଯ୍ୟକ୍ରମର ଶୁଭ ଉଦଘାଟନ କରିଥିଲେ । ଅତିଥିମାନେ ଆୟୁର୍ବେଦ ଚିକିତ୍ସା ଉପରେ ନିଜ ନିଜର ମତ ପ୍ରକାଶ କରିଥିଲେ । ଆୟୁର୍ବେଦ ଚିକିତ୍ସା ଦ୍ୱାରା ସାଇଡ ଇଫେକ୍ଟ (ପାର୍ଶ୍ୱ ପ୍ରତିକ୍ରିୟା) ନଥିବାରୁ ଲୋକଙ୍କ ଏଥିପ୍ରତି ଆଗ୍ରହ ପ୍ରକାଶ କରିଥାନ୍ତି । ଜଟିଳରୁ ଜଟିଳ ରୋଗ ମଧ୍ୟ ଉପଶମ ହୋଇପାରିବ ବୋଲି ଅତିଥିମାନେ ନିଜର ମତ ପ୍ରକାଶ କରିଥିଲେ । କବିରାଜ ନିମାଇଁ ଚରଣ ପାଢ଼ୀଙ୍କୁ ସ୍ୱାସ୍ଥ୍ୟ ବିଳାସ ଲେଖକ ସମ୍ମାନରେ ସମ୍ମାନୀତ କରାଯାଇଛି । ସେହିଭଳି କବିରାଜ ଦୁର୍ଗା ପ୍ରସାଦ ଭଟ୍ଟଙ୍କୁ କବିରାଜ ସତ୍ୟ ନାରାୟଣ ପାତ୍ର ସ୍ମୃତି ସମ୍ମାନରେ ସମ୍ମାନିତ କରାଯାଇଛି । ଅତିଥି ମାନଙ୍କ ଦ୍ୱାରା ଉପଢୌକନ ଓ ମାନପତ୍ର ଦେଇ ସମ୍ମାନୀତ କରାଯାଇଥିଲା । ପରିଶେଷରେ କବିରାଜ ରାମନାଥ ପାତ୍ର କାର୍ଯ୍ୟକ୍ରମକୁ ପରିଚାଳନା କରିବା ସହ ଧନ୍ୟବାଦ ଅର୍ପଣ କରିଥିଲେ । ସକାଳ ୮ ଘଣ୍ଟା ସମୟରେ ଧନନ୍ତ୍ୱରୀ ପୂଜା ଅନୁଷ୍ଠିତ ହୋଇଥିଲା । ଏହି ପୂଜାରେ ବହୁ ଜ୍ଞାନୀ ଗୁଣି ସାମ୍ବାଦିକ ଓ ଜନ ସାଧାରଣ ଯୋଗ ଦେଇଥିଲେ ।
