ବୌଦ୍ଧ,୨ା୧୧- ଆସନ୍ତା ନଭେମ୍ବର ୧୧ ରୁ ୧୩ ତାରିଖ ପର୍ଯ୍ୟନ୍ତ ତିନିଦିନ ଧରି ବୌଦ୍ଧ ଇନଡୋର ଷ୍ଟାଡିୟମରେ ରାଜ୍ୟସ୍ତରୀୟ ବ୍ୟାଡମିଣ୍ଟନ ଚଂପିଆନସିପ ଅନୁଷ୍ଠିତ ହେବ ବୋଲି ସାମ୍ବାଦିକ ସମ୍ମିଳନୀରେ ବ୍ୟାଡମିଣ୍ଟନ ଆସୋସିଏସନ ବୌଦ୍ଧ ତରଫରୁ ସୂଚନା ଦିଆଯାଇଛି । ରାଜ୍ୟ ବ୍ୟାଡମିଣ୍ଟନ ଆସୋସିଏସନ ଦ୍ୱାରା ମାନ୍ୟତାପ୍ରାପ୍ତ ଏହି ରାଜ୍ୟସ୍ତରୀୟ ବ୍ୟାଡମିଣ୍ଟନ ଚଂପିଆନସିପର ଆୟୋଜନଭାର ଚଳିତବର୍ଷ ବ୍ୟାଡମିଣ୍ଟନ ଆସୋସିଏସନ ବୌଦ୍ଧକୁ ନ୍ୟସ୍ତ କରାଯାଇଛି । । ୧୯ ବର୍ଷରୁ କମ୍ ବୟସ ବର୍ଗର ଖେଳାଳୀମାନଙ୍କ ମଧ୍ୟରେ ଏହି ବ୍ୟାଡମିଣ୍ଟନ ଚଂପିଆନସିପ୍ ଅନୁଷ୍ଠିତ ହେବ ଏବଂ ଉଭୟ ପୁରୁଷ ଓ ମହିଳା ଖେଳାଳୀଙ୍କ ମଧ୍ୟରେ ଏକକ, ଯୁଗଳ ଓ ମିକ୍ସଡ ଡବଲସ୍ ପ୍ରତିଯୋଗିତା ଅନୁଷ୍ଠିତ ହେବ । ରାଜ୍ୟ ବ୍ୟାଡମିଣ୍ଟନ ଆସୋସିଏସନର ସଂପାଦକ ଶ୍ରୀ ନିଲିନ କୁମାର ଓ କୋଷାଧ୍ୟକ୍ଷ ପ୍ରଦିପ କୁମାର ମହାନ୍ତି ବୌଦ୍ଧ ଆସି ସ୍ଥାନୀୟ ଇନଡୋର ଷ୍ଟାଡିୟମରେ ଚଂପିଆନସିପ୍ର ପ୍ରସ୍ତୁତି ନିମନ୍ତେ ନିଆଯାଇଥିବା ପଦକ୍ଷେପର ଅଗ୍ରଗତି ସମୀକ୍ଷା କରିବାସହିତ ବୌଦ୍ଧ ବ୍ୟାଡମିଣ୍ଟନ ଆସୋସିଏସନକୁ ଏହି ଆୟୋଜନ ନିମନ୍ତେ ଆବଶ୍ୟକୀୟ ମାର୍ଗଦର୍ଶନ କରାଇଛନ୍ତି । ଏହି ରାଜ୍ୟସ୍ତରୀୟ ବ୍ୟାଡମିଣ୍ଟନ ଚଂପିଆନସିପର ସଫଳ ଆୟୋଜନ ନିମନ୍ତେ ଜିଲ୍ଲାପ୍ରଶାସନ, ସରକାରୀ ତଥା ବେସରକାରୀ ଅନୁଷ୍ଠାନ, ବ୍ୟକ୍ତିବିଶେଷ, ଜନସାଧାରଣ ତଥା ମିଡିଆବନ୍ଧୁଙ୍କ ସହଯୋଗ ନିମନ୍ତେ ବୌଦ୍ଧ ବ୍ୟାଡମିଣ୍ଟନ ଆସୋସିଏସନ ତରଫରୁ ସଭାପତି ଜୁଲିଅସ ସିଜର ମହାକୁଳ, ସମ୍ପାଦକ ହୃଦାନନ୍ଦ ମିଶ୍ର ଏବଂ ଅର୍ଗାନାଇଜିଂ ସେକ୍ରେଟାରୀ ସୁନ୍ଦର ପ୍ରକାଶ ଅଗ୍ରୱାଲ ନିବେଦନ କରିଛନ୍ତି ।
