ଫୁଲବାଣୀ:- ଫୁଲବାଣୀ ସ୍ଥିତ ପୋଲିସ ଉଚ୍ଚ ବିଦ୍ୟାଳୟରେ ୭୨ତମ ଭାରତ ସ୍କାଉଟସ ଓ ଗାଇଡର ପ୍ରତିଷ୍ଠା ଦିବସ ବିଦ୍ୟାଳୟର ପ୍ରଧାନ ଶିକ୍ଷକ ଦେବୀ ଶତପଥୀଙ୍କ ତତ୍ତ୍ୱାବଧାନରେ ପାଳିତ ହୋଇଯାଇଛି । ସ୍କାଉଟ୍ ଓ ଗାଇଡ୍ ଛାତ୍ରଛାତ୍ରୀ ମାନେ ଫୁଲବାଣୀ ସହରରେ ଏକ ରାଲି ମାଧ୍ୟମରେ ପରିକ୍ରମା କରିଥିଲେ । ପରେ ବିଦ୍ୟାଳୟ ପରିସରରେ ଆଇପିଇଡିଇଓ କନ୍ଧମାଳର ରଙ୍କନିଧି ବେହେରା ମୁଖ୍ୟ ଅତିଥି ଭାବେ ଯୋଗଦେଇ ସ୍କାଉଟ ଗାଇଡର ପ୍ରତିଷ୍ଠାତା ପାୱେଲଙ୍କ ଫଟୋ ଚିତ୍ରରେ ପୁଷ୍ପମାଲ୍ୟ ଅର୍ପଣ ଓ ପ୍ରଦୀପ ପ୍ରଜ୍ଜଳନ କରିଥିଲେ । କାର୍ଯ୍ୟକ୍ରମ ପ୍ରାରମ୍ଭରେ ସର୍ବଧର୍ମ ପ୍ରାର୍ଥନା,ପତାକା ଉତ୍ତୋଳନ କରାଯାଇ ସଭାକାର୍ଯ୍ୟ ଆରମ୍ଭ କରାଯାଇଥିଲା । ପ୍ରଧାନ ଶିକ୍ଷକ ଅତିଥି ପରିଚୟ ପ୍ରଦାନ କରିବା ସଙ୍ଗେସଙ୍ଗେ ସ୍ୱାଗତ ଭାଷଣ ଦେଇଥିଲେ । ମୁଖ୍ୟ ଅତିଥି ଶ୍ରୀ ବେହେରା ବିଦ୍ୟାଳୟ ସ୍ତରରେ ସ୍କାଉଟ ଓ ଗାଇଡର ଆବଶ୍ୟକତା ଏବଂ ଛାତ୍ରଛାତ୍ରୀମାନେ ନିଜକୁ ସେବା ସହିତ ଶୃଙ୍ଖଳିତ କରିଥାଏ ଓ ଏହା କିପରି ମାନସିକ, ବୌଦ୍ଧିକ, ନୈତିକ ଓ ସାମାଜିକ ଶାରୀରିକ, ଆଧ୍ୟାତ୍ମିକ, କ୍ଷେତ୍ରରେ ସମାଜ, ଦେଶ ତଥା ଜାତିର ବିକାଶରେ ସହାୟକ ହୋଇଥାଏ ସେ ଦିଗରେ ଦିଗଦର୍ଶନ ଦେଇଥିଲେ । ବିଦ୍ୟାଳୟର ସମସ୍ତ ଛାତ୍ରଛାତ୍ରୀ ଓ ଶିକ୍ଷକ ଶିକ୍ଷୟିତ୍ରୀ ମାନେ ଉପସ୍ଥିତ ଥିଲେ ।
