ପାଟଣାଗଡ/ଖପ୍ରାଖୋଲ : ବଲାଙ୍ଗିର ଜିଲ୍ଲା ଖପ୍ରାଖୋଲ ବ୍ଲକ ଗନ୍ଧମାର୍ଦ୍ଦନ ପାହାଡ଼ ଉପରେ ଗୁରୁବାର ଭୋର ସକାଳେ ପୋଲିସ ଓ ମାଓବାଦୀ ମଧ୍ୟରେ ଗୁଳି ବିନିମୟ ହୋଇଥିବା ବେଳେ ଦୁଇ କ୍ୟାଡ଼ର ମାଓବାଦୀ ନିହତ ହୋଇଥିବା ଜଣାଯାଇଛି । ସୂଚନା ଅନୁସାରେ ଡିଭିଏଫ ଓ ଏସଓଜି ମିଳିତ ଭବେ ବୁଧବାର ରାତିରୁ କମ୍ବିଂ ଅପରେସନ ଜାରି ରଖିଥିବା ବେଳେ ଗନ୍ଧମାର୍ଦ୍ଦନ ପାହାଡ଼ ମହୁଲପାଲି ଜଙ୍ଗଲ ଉପରେ ପୋଲିସ ଉପରକୁ ମାଓବାଦୀ ପ୍ରଥମେ ଗୁଳି ଚଳାଇଥିବା ବେଳେ ପୋଲିସ ମଧ୍ୟ ପାଲଟା ଜବାବ ଦେଇଥିଲା । ଉଭୟ ପକ୍ଷରୁ ଦୀର୍ଘ ସମୟ ଧରି ଗୁଳି ବିନିମୟ ହୋଇଥିବା ବେଳେ ପୋଲିସ ଗୁଳିରେ ଦୁଇ ମହିଳା କ୍ୟାଡ଼ର ମାଓବାଦୀ ନିହତ ହୋଇଥିବା ବେଳେ ଅନ୍ୟ ମାନେ ଛତ୍ର ଭଙ୍ଗ ଦେଇଥିବା ପୋଲିସ ସୂଚନା ଦେଇଛି । ସନ୍ଧ୍ୟା ଯାଏ ସର୍ଚ୍ଚ ଅପରେସନ ଜାରି ରହିଥିବା ଜଣାଯାଇଛି । ମୃତଦେହକୁ ପାହାଡ଼ ଉପରୁ ପୋଲିସ ଉଦ୍ଧାର ବଲାଙ୍ଗିର ନେଇଥିବା ବେଳେ ଦୁଇ ବନ୍ଧୁକ ସହ ବିଭିନ୍ନ ମାଓ ସାମଗ୍ରୀ ଜବତ ହୋଇଥିବା ଜଣାଯାଇଛି । ଏହି ଘଟଣାକୁ ନେଇ ଗନ୍ଧମାର୍ଦ୍ଦନ ପାହାଡ଼ ତଳି ଅଞ୍ଚଳରେ ଭୟର ବାତାବରଣ ସୃଷ୍ଟି ହୋଇଛି ।
