ବାଲିଗୁଡ଼ା: ଘରକୁ ଘର ବୁଲି ଛତୁଆ ବାଣ୍ଟୁଛନ୍ତି ଅଙ୍ଗୱାଡ଼ି ସୁପର ଭାଇଜର । ଏପରି ଦୃଶ୍ୟ ଦେଖିବାକୁ ମିଳିଛି କନ୍ଧମାଳ ଜିଲ୍ଲା ଦାରିଙ୍ଗବାଡି ବ୍ଲକ ଅନ୍ତର୍ଗତ ବ୍ରାହ୍ମଣୀଗାଁ କ୍ଲଷ୍ଟରରେ । ରାଜ୍ୟ ବ୍ୟାପି ଅଙ୍ଗୱାଡ଼ି କର୍ମୀ ଓ ସହାୟିକା ମାନେ ତାଙ୍କର ଦାବୀ ପୂରଣ ଲାଗି ଧାରଣା ରେ ବସିଥିବା ବେଳେ ସମସ୍ତ ଅଙ୍ଗୱାଡ଼ି କେନ୍ଦ୍ର ଦୀର୍ଘ ଦିନ ହେଲା ବନ୍ଦ ରହିଛି । ଯାହାରି ଫଳରେ କୋମଳ ମତି ଶିଶୁ ମାନେ ପ୍ରାକ୍ ଶିକ୍ଷା ପାଇବାରୁ ବଞ୍ଚିତ ହୋଇଥିବା ବେଳେ ଗର୍ଭବତୀ ଓ ପ୍ରସୂତୀ ମହିଳାମାନେ ସମସ୍ୟାରେ ପଡ଼ିଛନ୍ତି । ଅଙ୍ଗୱାଡ଼ି କର୍ମୀଙ୍କ ଜରିଆରେ ଯେଉଁ ସବୁ ସରକାରୀ କାର୍ଯ୍ୟ ତ୍ୱରାନ୍ୱିତ ହେଉଥିଲା ତାହା ବର୍ତ୍ତମାନ ଠପ୍ ହୋଇଯାଇଛି । ଶିଶୁ ମାନଙ୍କ ପଞ୍ଜିକରଣ, ଗର୍ଭବତୀ ଓ ପ୍ରସୂତୀ ମହିଳାଙ୍କ ତଦାରଖ ସେମାନଙ୍କୁ ଖାଦ୍ୟ ପ୍ରଦାନ, କୋମଳମତି ଶିଶୁ ମାନଙ୍କ ପ୍ରାକ୍ ଶିକ୍ଷା ଆଦି କାର୍ଯ୍ୟ ବନ୍ଦ ରହିଛି । ସ୍କୁଲ ଯିବା ସମୟରେ ପିଲାଏ ଚକ ଗଡେଇବା , ବାଟି ଖେଳିବା ତଥା ଅନାବନା ଖେଳ କୁଦରେ ସମୟ ବିତାଇବା ଦେଖିବାକୁ ମିଳୁଛି । ଏହି ପରିପ୍ରେକ୍ଷୀରେ ସରକାରଙ୍କ ଖାଦ୍ୟ ସୁରକ୍ଷା ଯୋଜନାରୁ ଯେପରି କେହି ବାଦ୍ ନ ପଡ଼ନ୍ତି ସେଥିପାଇଁ କନ୍ଧମାଳ ଜିଲ୍ଲାପାଳ ଆଶିଷ ଈଶ୍ୱର ପାଟିଲ ଓ ସିଡିପିଓଙ୍କ ନିର୍ଦ୍ଦେଶରେ ଦାରିଙ୍ଗବାଡ଼ି ବ୍ଲକ ଅଞ୍ଚଳର ବିଭିନ୍ନ କ୍ଳଷ୍ଟରର ସୁପର ଭାଇଜରମାନଙ୍କ ଜରିଆରେ ଅଙ୍ଗୱାଡ଼ି କେନ୍ଦ୍ର ମାନଙ୍କରେ ପହଞ୍ଚି ପ୍ରତ୍ୟେକ ପଞ୍ଜୀକୃତ ଗର୍ଭବତୀ, ପ୍ରସୂତୀ ମହିଳା ଓ ଅଙ୍ଗୱାଡ଼ି ଶିଶୁ ମାନଙ୍କୁ ଛତୁଆ ପହଞ୍ଚାଇବାକୁ ଚେଷ୍ଟା କରୁଛନ୍ତି । ଆଜି ବ୍ରାହ୍ମଣୀଗାଁ କ୍ଲଷ୍ଟରର ସୁପର ଭାଇଜର ରୁପିନା ନାୟକ ଘରକୁ ଘର ବୁଲି ମହିଳା ସ୍ୱଂୟ ସହାୟିକା ଗୋଷ୍ଠୀଙ୍କ ସହାୟତାରେ ଛତୁଆ ବଣ୍ଟନ କରୁଥିବା ଦେଖିବାକୁ ମିଳିଛି । କୋମଳମତି ଶିଶୁଙ୍କ ଭବିଷ୍ୟତ ଓ ମହିଳାମାନଙ୍କ ସୁରକ୍ଷାକୁ ଦୃଷ୍ଟିରେ ରଖି ସରକାର ତୁରନ୍ତ ପଦକ୍ଷେପ ଗ୍ରହଣ କରିବାକୁ ବୁଦ୍ଧିଜୀବୀ ମହଲରେ ମତ ପ୍ରକାଶ ପାଇଛି ।
