ଭୋପାଳ : ଆଜିକାଲି ବିବାହ ସମାରୋହ କିମ୍ବା ଇଭେଣ୍ଟରେ ନୃତ୍ୟ ସମୟରେ ହୃଦଘାତ ହେତୁ ମୃତ୍ୟୁ ଘଟଣା ବାରମ୍ବାର ସାମ୍ନାକୁ ଆସୁଛି । ମଧ୍ୟପ୍ରଦେଶର ସେଓନିର ବାନ୍ଦୋଲ ପୋଲିସ ଷ୍ଟେସନ ଅଧୀନରେ ଥିବା ବଖରୀ ଗ୍ରାମରେ ଏଭଳି ଏକ ମାମଲା ସାମ୍ନାକୁ ଆସିଛି । ଯେଉଁଠାରେ ଜଣେ ବୃଦ୍ଧ ମହିଳା ନାତୁଣୀଙ୍କ ବିବାହରେ ହଲଦୀ ସଂଗୀତରେ ନାଚୁଥିବାବେଳେ ହୃଦଘାତରେ ମୃତ୍ୟୁ ବରଣ କରିଥିଲେ । ହଲଦୀ ସଂଗୀତ କାର୍ଯ୍ୟକ୍ରମରେ ଏହି ଜେଜେମା’ଙ୍କ ମୃତ୍ୟୁ ହଠାତ୍ କ୍ୟାମେରାରେ ଧରାପଡିଛି, ଯାହାର ଭିଡିଓ ମଧ୍ୟ ସାମ୍ନାକୁ ଆସିଛି ।
ବାନ୍ଦୋଲ ପୋଲିସର ଦାୟିତ୍ୱରେ ଥିବା ଦିଲୀପ ପଞ୍ଚେଶ୍ୱରଙ୍କ ସୂଚନା ଅନୁଯାୟୀ ସେଓନି ଜିଲ୍ଲାର ବାନ୍ଦୋଲ ପୋଲିସ ଷ୍ଟେସନ ଅନ୍ତର୍ଗତ ବଖରୀ ଗାଁର ସାହୁ ପରିବାରରେ ଏକ ବିବାହ ଉତ୍ସବରେ ନୃତ୍ୟ ସମୟରେ ଜଣେ ବୃଦ୍ଧ ମହିଳାଙ୍କ ହୃଦଘାତରେ ମୃତ୍ୟୁ ଘଟିଥିବା ସୂଚନା ମିଳିଛି । ମହିଳାଙ୍କ ମୃତ୍ୟୁ ପରେ ବିବାହର ସୁଖ ଶୋକରେ ପରିଣତ ହୋଇଛି । ସୂଚନାଯୋଗ୍ୟ ଯେ ସେଓନିର ବଖରୀ ଗାଁର ସାହୁ ପରିବାରର ଝିଅର ବିବାହ ଛିନ୍ଦାୱାଡା ଜିଲ୍ଲାରେ ସ୍ଥିର ହୋଇଥିଲା ।
ବିବାହର ଗୋଟିଏ ଦିନ ପୂର୍ବରୁ ହଲଦୀ କାର୍ଯ୍ୟକ୍ରମରେ ଝିଅର ଜେଜେ ମାଆର ଚାରି ଭଉଣୀ ଏକାଠି ଖୁସିମନାଇବା ପାଇଁ ନାଚିଥିଲେ । ଏହି ସମୟରେ ଭୀମଗଡର ଶୌଦା ସାହୁ ନାଚୁଥିବା ବେଳେ ତଳେ ପଡ଼ିଯାଇଥିଲେ । ତାଙ୍କୁ ତୁରନ୍ତ ଜିଲ୍ଲା ଡାକ୍ତରଖାନା ନିଆଯାଇଥିଲା, ଯେଉଁଠାରେ ଡାକ୍ତର ତାଙ୍କୁ ମୃତ ବୋଲି ଘୋଷଣା କରିଥିଲେ । ମୃତ୍ୟୁର ଲାଇଭ ଭିଡିଓ ମଧ୍ୟ ଏକ କ୍ୟାମେରାରେ କଏଦ ହୋଇଛି, ଯାହା ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି ।
