ନୂଆପଡା : ନୂଆପଡ଼ା ଜିଲ୍ଲା ଖଡ଼ିଆଳ ଥାନା ଅନ୍ତର୍ଗତ ୩୫୩ ନଂ ଜାତୀୟ ରାଜପଥ ଚକାଡଙ୍ଗରଠାରେ ଏକ ମର୍ମନ୍ତୁଦ ସଡ଼କ ଦୁର୍ଘଟଣା ହୋଇଥିଲା । ଏହି ଦୁର୍ଘଟଣା ଦୁଇ ଗୋଟି ବାଇକ ମଧ୍ୟରେ ହୋଇଥିବା ବେଳେ ଜଣେ ଶିଶୁର ମୃତ୍ୟୁ ହୋଇଥିଲା । ସୂଚନା ମତେ ଖଡ଼ିଆଳ ବ୍ଲକ ଛତା ଗ୍ରାମର ସଚିନ ମାଝୀ ଓ ତାଙ୍କ ପୁଅ ମାଲିକ ମାଝୀ(୪) ସମେତ ରିବେଡା ଗ୍ରାମର ଶଙ୍କର ମାଝୀ ଓ କୋମନା ଥାନା ଅନ୍ତର୍ଗତ ଝାଲକୁସୁମ ଗ୍ରାମର ଲିଙ୍ଗରାଜ ନିଆଁଲଙ୍କ ମଧ୍ୟରେ ବାଇକ ମୁହାଁମୁହିଁ ଧକ୍କା ହୋଇଥିଲା । ଯାହା ଫଳରେ ଛୋଟ ଶିଶୁ ମଲିକ ମାଝୀଙ୍କ ସମେତ ସଚିନ ମାଝୀ, ଶଙ୍କର ମାଝୀ ଓ ଲିଙ୍ଗରାଜ ନିଆଲ ଗୁରୁତର ଆହତ ହୋଇପଡ଼ିଥିଲେ । ସଙ୍ଗେ ସଙ୍ଗେ ଗୁରୁତର ଚାରିଜଣଙ୍କୁ ଖଡ଼ିଆଳ ଉପଖଣ୍ଡ ଚିକିତ୍ସାଲୟକୁ ଆମ୍ବୁଲାନ୍ସରେ ଅଣା ଯାଇଥିଲା । ହେଲେ ଗୁରୁତର ଥିବା ଶିଶୁ ମାଲିକ ମାଝିର ମୃତ୍ୟୁ ହୋଇଯାଇଥିବା ବେଳେ ତିନି ଜଣ ଗୁରୁତରଙ୍କୁ ନୂଆପଡା ଜିଲା ଚିକିତ୍ସାଲୟକୁ ସ୍ଥାନାନ୍ତର କରାଯାଇ ଥିବା ଖଡ଼ିଆଳ ଉପଖଣ୍ଡ ଚିକିତ୍ସାଲୟର ଇନଚାର୍ଜ ଡାକ୍ତର ରଞ୍ଜିତ ରାଉତ ପ୍ରକାଶ କରିଛନ୍ତି । ଅପରପକ୍ଷରେ ଖଡ଼ିଆଳ ପୋଲିସ ଆଇଆଇସି ଅନିରୁଦ୍ଧ ମୁଦୁଲି ମୃତ ଶିଶୁର ଶବ ବ୍ୟବଚ୍ଛେଦ କରିବା ସହିତ ଦୁର୍ଘଟଣା ତଦନ୍ତ କରୁଥିବା ପ୍ରକାଶ କରିଥିଲେ ।
