ନନ୍ଦାହାଣ୍ଡି : ଆଜି ନବରଙ୍ଗପୁର ଜିଲ୍ଲା ନନ୍ଦାହାଣ୍ଡି ବ୍ଲକ ଝାଡବନ୍ଧଗୁଡା ପଞ୍ଚାୟତ ଅନ୍ତର୍ଗତ ଲଙ୍ଗଳ ଅଟଳ ଗ୍ରାମରେ ଦ୍ୱିପ୍ରହର ୩.୩୦ ସମୟରେ ବଜ୍ରାଘାତ ଯୋଗୁଁ ଜଣେ ମୃତ୍ୟୁବରଣ କରିଛନ୍ତି । ମୃତକ ଜଣକ ହେଲେ ନନ୍ଦାହାଣ୍ଡି ବ୍ଲକ ଝାଡବନ୍ଧଗୁଡା ପଞ୍ଚାୟତ ଅନ୍ତର୍ଗତ ଲଙ୍ଗଳ ଅଟଳ ଗ୍ରାମର ଅଜିତ ମୁଦୁଲି ବୟସ ୩୮ ବୋଲି ଜଣାପଡିଛି । ପ୍ରତିଦିନ ଭଳି ସେ ଏକ କିଲୋମିଟର ଦୂରରେ ଥିବା କୋରାପୁଟ ଜିଲ୍ଲାର ଦଶମନ୍ତପୁର ବ୍ଲକରେ କାମ କରିବା ପାଇଁ ଯାଇଥାନ୍ତି । କାମସାରି ଆସିବା ବେଳକୁ ଲଙ୍ଗଳ ଅଟଳ ଗ୍ରାମ ପଖରେ ଅଚାନକ ଘଡଘଡି ଓ ବିଜୁଳି ମାରିଥିଲା । ସେଠାରେ ଅଜିତ ଅଚେତ ହୋଇଯାଇଥିଲେ । ନିକଟରେ ଥିବା ଜମିରେ କାମ କରୁଥିବା ଲୋକମାନେ ଅଜିତକୁ ଉଦ୍ଧାର କରି ୧୦୮ ଆମ୍ବୁଲାନ୍ସ ଯୋଗେ ନବରଙ୍ଗପୁର ମୁଖ୍ୟ ଚିକିତ୍ସାଳୟକୁ ନେଇଥିଲେ । ସେଠାରେ ଡ଼ାକ୍ତର ତାଙ୍କୁ ମୃତ ଘୋଷଣା କରିଥିଲେ । ୧୨ ରୁ ୧୫ ବର୍ଷ ପୂର୍ବେ ଦଶମନ୍ତପୁର ବ୍ଲକର ଗିରଲିଗୁମା ଗ୍ରାମରୁ ଆସି ଲଙ୍ଗଳ ଅଟଳ ଗ୍ରାମରେ ସେ ଘରଜ୍ୱାଇ ଭାବେ ରହୁଥିଲେ । ଅଜିତର ସ୍ତ୍ରୀ , ଆଠ ଓ ଚାରି ବର୍ଷର ଦୁଇ ଗୋଟି ଝିଅ ଥିବା ଜଣାପଡିଛି । ଆସନ୍ତା କାଲି ଶବ ବ୍ୟବଚ୍ଛେଦ ପରେ ପରିବାର ବର୍ଗଙ୍କୁ ଶବ ହସ୍ତାନ୍ତର କରାଯିବ ବୋଲି ଜଣାପଡିଛି
