ଦିଗପହଣ୍ଡି : ଗଞ୍ଜାମ ଜିଲ୍ଲା ଦିଗପହଣ୍ଡି ଥାନା ଅନ୍ତର୍ଗତ ପଦ୍ମନାଭପୁର ଗ୍ରାମରେ ଗୁରୁବାର ଦିନ ରାତି ୯ ଘଣ୍ଟା ସମୟରେ ବୋମାମାଡ଼ ହେଇଛି । ପଦନାଭପୁର ମୁଖ୍ୟ ରାସ୍ତାରେ ରହୁଥିବା ଶିଶୁ ମନ୍ଦିର ପରିଚାଳକ ସୂର୍ଯ୍ୟନାରାୟଣ ବେହେରାଙ୍କ ଘରକୁ ଲକ୍ଷ୍ୟ କରି ବୋମାମାଡ଼ କରାଯାଇଛି । ଗୋଟିଏ ବୋମା ବେହେରାଙ୍କ ଘର କବାଟକୁ ବାଜି ଫୁଟିଥିବା ବେଳେ ଆଉ ଏକ ବୋମା ଘର ନିକଟରେ ପଡି ଫୁଟିଥିଲା । ପ୍ରତ୍ୟକ୍ଷଦର୍ଶୀଙ୍କ ସୂଚନା ପ୍ରକାରେ ଗୋଟିଏ ବାଇକରେ ତିନି ଜଣ ଯୁବକ ପହଞ୍ଚି ବୋମାମାଡ କରିବା ପରେ ଚିକିଟି ରାସ୍ତାରେ କ୍ଷୀପ୍ର ଗତିରେ ଚାଲି ଯାଇଥିଲେ । ହଠାତ୍ ବଡ଼ ଶବ୍ଦ ଶୁଣି ଛାତ ଉପରେ ଥିବା ସୂର୍ଯ୍ୟ ନାରାୟଣ ଓ ପରିବାରର ଅନ୍ୟ ସଦସ୍ୟ ମାନେ ତଳକୁ ଓହ୍ଲାଇବା ପରେ କବାଟରେ ବୋମାମାଡ ହେଇଥିବା ଦେଖିଥିଲେ । ଆଖପାଖ ଲୋକେ ମଧ୍ୟ ଘଟଣା ସ୍ଥଳରେ ପହଞ୍ଚିବା ପରେ ଆଉ ଏକ ଅଫୁଟା ବୋମା ଘର ନିକଟରେ ପଡ଼ିଥିବା ଦେଖିଥିଲେ । ଘଟଣା ନେଇ ପୋଲିସକୁ ସୂଚନା ଦିଆଯିବା ପରେ ଦିଗପହଣ୍ଡି ପୋଲିସ ଟିମ୍ ପହଞ୍ଚି ତଦନ୍ତ ଆରମ୍ଭ କରିଥିବା ଜଣାପଡିଛି । ତେବେ କିଏ ଏବଂ କାହିଁକି ଏଭଳି ବୋମାମାଡ କରିଛି ସେ ନେଇ କୌଣସି ପ୍ରକାର ସୂଚନା ମିଳିପାରିନାହିଁ ।
