ଫୁଲବାଣୀ,୨୮/୫: ସାମ୍ବାଦିକ ସ୍ୱର୍ଗତ କୁନାଲ ବେହେରାଙ୍କ ଶୁଦ୍ଧି କାର୍ଯ୍ୟରେ କନ୍ଧମାଳ ଓୟୁଯେ ଶାଖାର କର୍ମକର୍ତ୍ତା ଯୋଗଦେଇ ତାଙ୍କର ଅମର ଆତ୍ମାର ସଦ୍ଗତି କାମନା କରିବା ସହିତ ଶୋକାକୁଳ ପରିବାରକୁ ସାନ୍ତ୍ୱନା ଦେଇଥିଲେ । ପ୍ରକାଶଥାଉକି ନନ୍ଦିଘୋଷ ଟିଭିର ରାଇକିଆ ପ୍ରତିନିଧି ହେଉଛନ୍ତି କୁନାଲ ବେହେରା । ମାତ୍ର ୩୭ ବର୍ଷ ବୟସରେ ହୃଦ୍ଘାତରେ କଟକ ଏସସିବିରେ ଚିକିତ୍ସାଧୀନ ଅବସ୍ଥାରେ ଅକାଳ ବିୟୋଗ ଘଟିଥିଲା । ଘରେ କୁନାଲଙ୍କ ପତ୍ନୀ ଓ ୫ ମାସର ଶିଶୁପୁତ୍ର ରହିଛନ୍ତି । ସେ ଭୁବନେଶ୍ୱରରେ ସାମ୍ବାଦିକତା ଶିକ୍ଷା ପରେ ନନ୍ଦିଘୋଷ ଟିଭିରେ ଯୋଗ ଦେଇଥିଲେ । ଏହି ଦୁଃଖଦ ଖବର ଶୁଣିବା ପରେ କନ୍ଧମାଳ ଓୟୁଯେ ଶାଖାର ଜିଲ୍ଲା ସଭାପତି ଅଶୋକ କୁମାର ମହାନ୍ତି କାର୍ଯ୍ୟକାରୀ ସଭାପତି ପ୍ରଶାନ୍ତ କୁମାର ବେହେରା ସମ୍ପାଦକ ଅସିତ କୁମାର ବେହେରା, ସହ ସମ୍ପାଦକ ଏବଂ ଆଇନ ଉପଦେଷ୍ଟା ଆଦିତ୍ୟ ପ୍ରସାଦ ତ୍ରିପାଠୀ ଓ ଅଜିତ ନାୟକ, ଉତ୍ତମ ଖମ୍ବାରି, ଆଦିତ୍ୟ ପାଢୀ, ପ୍ରଦିପ କୁମାର ବେହେରାଙ୍କ ସମେତ ସଂଘର ଅନ୍ୟ କର୍ମକର୍ତ୍ତାମାନେ ଉପସ୍ଥିତ ରହି ଗଭୀର ଦୁଃଖ ପ୍ରକାଶ କରିବା ସହ ପରିବାରକୁ ଆର୍ଥିକ ସହଯୋଗ ମଧ୍ୟ କରାଯାଇଥିଲା । ଏହି ଅବସରରେ ଓଡିଶା ୟୁନିଅନ ଅଫ ଜର୍ଣ୍ଣାଲିଷ୍ଟର ରାଜ୍ୟ ସଭାପତି ପ୍ରସନ୍ନ ମହାନ୍ତି ଏବଂ ସାଧାରଣ ସମ୍ପାଦକ ଅଶୋକ ନନ୍ଦ ଗଭୀର ଶୋକ ପ୍ରକାଶ କରିବା ସହିତ ଏହିପରି ସମୟରେ ତାଙ୍କ ପରିବାରକୁ ଭଗବାନ ଧୈର୍ଯ୍ୟ ଓ ଶକ୍ତି ପ୍ରଦାନ କରନ୍ତୁ ବୋଲି ପ୍ରାର୍ଥନା କରିଛନ୍ତି ।
