ଘୁ.ଉଦୟଗିରି: କଳିଙ୍ଗାଠାରୁ ଘୁ. ଉଦୟଗିରି ରାଜ୍ୟ ରାଜପଥ ନନ୍ଦଗିରି ନିକଟସ୍ଥ ପଣସ ବାଙ୍କୀ ନିକଟରେ ଆଜି ଅପରାହ୍ନରେ ଏକ ଚଉଦଚକିଆ ଆଜବେଷ୍ଟ ବୋଝେଇ ଟ୍ରକ ନମ୍ବର ଓଡି ୦୭ ଏ କେ ୦୬୩୭ ଭାରସାମ୍ୟ ହରାଇ ଦୁର୍ଘଟଣା ଗ୍ରସ୍ତ ହୋଇଛି । ସୂଚନା ଅନୁସାରେ କେନ୍ଦୁଝରରୁ ଟ୍ରକରେ ଆଜବେଷ୍ଟ ବୋଝେଇ ହୋଇ ସାରଙ୍ଗଗଡ଼ ଅଭିମୁଖେ ଯାଉଥିବା ବେଳେ ଏହି ଦୁର୍ଘଟଣା ଘଟିଥିବା ଦେଖିବାକୁ ମିଳିଛି । ଦୁର୍ଘଟଣାର ଖବର ପାଇ ସ୍ଥାନୀୟ ଅଗ୍ନିଶମ ବାହିନୀ ଓ ଆମ୍ବୁଲାନ୍ସ ଘଟଣା ସ୍ଥଳକୁ ଯାଇଥିଲେ କିନ୍ତୁ ତା ପୂର୍ବରୁ ଆହତଙ୍କୁ ଏକ ଅଟୋ ଯୋଗେ ସ୍ଥାନୀୟ ସ୍ୱାସ୍ଥ୍ୟ କେନ୍ଦ୍ରକୁ ନିଆଯାଇଥିଲା । ଦୁର୍ଘଟଣାରେ ଟ୍ରକ ଡ୍ରାଇଭର ସଦାନନ୍ଦ ପ୍ରଧାନ (୪୫), ହେଲପର ଶାନ୍ତନୁ ନାୟକ (୧୯) ଗୁରୁତର ଆହତ ହୋଇ ସ୍ଥାନୀୟ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ପ୍ରାଥମିକ ଚିକିତ୍ସା ପରେ ତାଙ୍କୁ ବ୍ରହ୍ମପୁର ବଡ଼ମେଡ଼ିକାଲକୁ ସ୍ଥାନାନ୍ତର କରାଯାଇଥିବା ନେଇ କାର୍ଯ୍ୟରତ ଡାକ୍ତର ସୂଚନା ଦେଇଛନ୍ତି । ଖବର ପାଇ ଦୁର୍ଘଟଣା ସ୍ଥଳରେ ସ୍ଥାନୀୟ ପୋଲିସ ଏଏସଆଇ ବିନୟ ମହାରଣା, ଏଏସଆଇ ବୁଲୁ ବେହେରା ପହଞ୍ଚି ଉକ୍ତ ଦୁର୍ଘଟଣାର ଯାଞ୍ଚ କରୁଥିବା ଦେଖିବାକୁ ମିଳିଛି ।
