ଦଶପଲ୍ଲା : ଦଶପଲ୍ଲା ବ୍ଲକ୍ ଅନ୍ତର୍ଗତ ଟାକରାରେ ଗତ ରାତି ପ୍ରାୟ ୧୦ଟା ୪୦ରେ ବୋମାମାଡ଼ ହୋଇଛି । ଏଥିରେ ୨ ଜଣ ବ୍ୟକ୍ତି ଗୁରୁତର ହୋଇଛନ୍ତି । ପୂର୍ବ ଶତ୍ରୁତାକୁ କେନ୍ଦ୍ରକରି ଏହି ବୋମାମାଡ଼ ହୋଇଥିବା ଜଣାପଡ଼ିଛି । ସ୍ଥାନୀୟ ଅଧିବାସୀଙ୍କ କହିବା ଅନୁଯାୟୀ ଟାକରା ଅଞ୍ଚଳର ଶ୍ରୀନିବାସ ବେହେରା ପୂର୍ବ ବିବାଦକୁ କେନ୍ଦ୍ରକରି ପ୍ରଥମେ ଶକ୍ତିକାନ୍ତ ଷଡ଼ଙ୍ଗୀଙ୍କ ଦୋକାନକୁ ଏକ ବୋମା ମାଡ଼ କରିଥିଲେ । ଭୟରେ ସେ ଗୋପାଳପୁରସ୍ଥିତ ଘରକୁ ପଳାଇ ଆସୁଥିବା ବେଳେ ପିଛା କରି ସୁଶାନ୍ତ ଷଡ଼ଙ୍ଗୀଙ୍କ ଘର ଉପରକୁ ବୋମା ଫିଙ୍ଗିଥିଲେ । ଏଥିରେ ଶକ୍ତିକାନ୍ତ ଓ ସୁଶାନ୍ତ ଗୁରୁତର ହୋଇଛନ୍ତି । ଶ୍ରୀନିବାସଙ୍କୁ ସ୍ଥାନୀୟ ଲୋକେ କାବୁ କରିଥିବା ବେଳେ ଖବରପାଇ ଥାନା ଅଧିକାରୀ ମୁକେଶ କୁମାର ବେହେରା ପହଞ୍ଚି ସଂପୃକ୍ତ ବ୍ୟକ୍ତିଙ୍କ ଥାନାକୁ ଆଣିଛନ୍ତି । ଅନ୍ୟପଟେ ଆହତଙ୍କୁ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଛି ।
