ବ୍ରହ୍ମପୁର: ନିମଖଣ୍ଡି ଥାନା ପୋଲିସ ଏକ ବଡ଼ ଧରଣର ଜୁଆ ଆଡ୍ଡା ଉପରେ ଚଢ଼ଉ କରିଥିବା ସୂଚନା ମିଳିଛି । ସୂଚନା ପ୍ରକାରେ, ରବିବାର ରାତିରେ ଭାବିନିପୁର ସ୍ଥିତ ବଜରଙ୍ଗୀ ନଗର ଅଞ୍ଚଳରେ ଏକ ଘର ଭିତରେ ଏକ ବଡ଼ ଧରଣର ଜୁଆ ଆଡ୍ଡା ଚାଲିଥିବା ବିଶେଷ ସୂତ୍ରରୁ ଖବର ମିଳିଥିଲା । ସଦର ଏସ୍ଡିପିଓ ଶିବ ଶଙ୍କର ମହାପାତ୍ର, ନିମଖଣ୍ଡି ଥାନା ଅଧିକାରୀ ଭାବାନନ୍ଦ ପ୍ରଧାନ ଏକ ସ୍ୱତନ୍ତ୍ର ଟିମ ଗଠନ କରି ଉକ୍ତ ଜୁଆ ଆଡ୍ଡାରେ ଚଢ଼ାଉ କରିଥିଲେ । ପୋଲିସର ଏହି ଚଢ଼ଉରେ ଜୁଆ ଆଡ୍ଡାରୁ ୬ଜଣ ପୁରୁଷ ଓ ୧୦ଜଣ ମହିଳା ଜୁଆଡିଙ୍କୁ ଗିରଫ କରିବାରେ ସଫଳ ହୋଇଥିଲା । ଏବଂ ସେମାନଙ୍କ ନିକଟରୁ ୨ଲକ୍ଷ ୪୫ହଜାର ୩୬୦ଟଙ୍କା, ୧୪ଟି ମୋବାଇଲ ଫୋନ, ଦୁଇଟି ବାଇକ୍, ଗୋଟେ ଏଟିଏମ କାର୍ଡ, ଦୁଇଟି ତାସ୍ କାଟା ଜବତ କରିବା ସହ ଥାନା କେସ ନମ୍ବର ୨୩୧/୨୦୨୩ ରେ ଏକ ମାମଲା ରୁଜୁ କରିଛି ପୋଲିସ । କିଛି ମହିଳା ପୋଲିସ ଆଖିରେ ଧୂଳି ଦେଇ ବାରମ୍ବାର ସ୍ଥାନ ପରିବର୍ତ୍ତନ କରି ଏହି ଜୁଆ ଆଡ୍ଡା ଚଳାଇ ଆସୁଥିଲେ । କିଛି ଅସାମାଜିକ ବ୍ୟକ୍ତି ଏମାନଙ୍କୁ ସହଯୋଗ କରିବା ସହ ବ୍ରହ୍ମପୁର ସହର ତଥା ବ୍ରହ୍ମପୁର ଉପକଣ୍ଠ ଅଞ୍ଚଳ ମାନଙ୍କରେ ଭଡ଼ା ଘର ନେଇ ଏହି ଜୁଆ ଆଡ୍ଡା ଚଳାଉଛନ୍ତି । ପୂର୍ବରୁ ମଧ୍ୟ ଭାବିନିପୁର ଅଞ୍ଚଳରେ କିଛି ମହିଳା ମହିଳା ମାନେ ଜୁଆ ଆଡ୍ଡା ଚଳାଇ ଥିବା ବେଳେ ଦୁଇଥର ପୋଲିସ ଚଢ଼ାଉ କରି କିଛି ଜୁଆଡ଼ିକୁ ଗିରଫ କରିଥିଲା । ଗିରଫ ଜୁଆଡିଙ୍କ ମଧ୍ୟରେ ବ୍ରହ୍ମପୁର ଫାଷ୍ଟ ଗେଟ୍ ଅଞ୍ଚଳର ଜଣେ ମଦ ବେପାରୀ ରହିଥିବା ନେଇ ଚର୍ଚ୍ଚା ହେଉଛି । ଏହି ଚଢ଼ଉରେ ସଦର ଏସଡିପିଓ, ନିମଖଣ୍ଡି ଥାନା ଅଧିକାରୀଙ୍କ ସମେତ, ଏସଆଇ ଜ୍ୟୋତି ରଞ୍ଜନ ବେହେରା, ରସ୍ମିତା ସାମଲଙ୍କ ସମେତ ଅନ୍ୟ ପୋଲିସ କର୍ମଚାରୀ ମାନେ ସାମିଲ ଥିଲେ ।
