ନୂଆପଡ଼ା : ନୂଆପଡା ଜିଲ୍ଲା ବୋଡେ଼ନ ବ୍ଲକ ଫରସରା ଗ୍ରାମପଞ୍ଚାୟତ ଅନ୍ତର୍ଗତ ବଖଲିଖୁଣ୍ଟି ଗ୍ରାମରେ କଲେଟ ସର୍ପ ଦଂଶନରେ ଜଣେ ମହିଳାଙ୍କ ଅକାଳ ମୃତ୍ୟୁ ହୋଇଯାଇଛି । ସୂଚନା ଅନୁସାରେ ସ୍ୱର୍ଗତା ଭାନୁମତି ଧରୁଆ ସ୍ୱାମୀ ଘନଶ୍ୟାମ ଧରୁଆ ରାତ୍ରି ଭୋଜନ ପରେ ତାଙ୍କ ନିଜ ଘରେ ଶୋଇଥିବା ଅବସ୍ଥାରେ ଗୋଟିଏ କଲେଟ ସାପ ତାଙ୍କ ଡାହାଣ ହାତରେ ଦୁଇଥର ଚୋଟ ମାରିଥିଲା । ସାପଟିକୁ ପରିବାର ଲୋକେ ଘୋଡେଇ ରଖିଛନ୍ତି । ପରିବାର ଲୋକେ ତୁରନ୍ତ କାଳବିଲମ୍ବ ନକରି ଆମ୍ବୁଲାନ୍ସ ମାଧ୍ୟମରେ ସ୍ଥାନୀୟ ବୋଡେ଼ନ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ଚିକିତ୍ସା ପାଇଁ ଆଣିଥିଲେ କିନ୍ତୁ ଅବସ୍ଥା ସଙ୍କଟାପନ୍ନ ହେବାରୁ ତାଙ୍କୁ ଉପଖଣ୍ଡ ଚିକିତ୍ସା କେନ୍ଦ୍ର ଖଡ଼ିଆଳକୁ ସ୍ଥାନାନ୍ତର କରାଯାଇଥିଲା ,ହେଲେ ଖଡ଼ିଆଳରୁ ଉନ୍ନତ ଚିକିତ୍ସା ପାଇଁ ଜିଲ୍ଲା ଚିକିତ୍ସା କେନ୍ଦ୍ରକୁ ପ୍ରେରଣ କରିଥିଲେ । ସେଠାରେ ଅବସ୍ଥା ଜଟିଳ ହେବା ସହିତ ମୃତ୍ୟୁ ବରଣ କରିଥିଲେ । ସେ ୧୧ନମ୍ବର ୱାର୍ଡର ୱାର୍ଡ ସଭ୍ୟା ମଧ୍ୟ ଥିଲେ । ତାଙ୍କର ଦୁଇ ପୁଅ ଓ ଗୋଟିଏ ଝିଅ ଥିବା ବେଳେ ଏବେ ସେମାନେ ମା ଛେଉଣ୍ଡ ହୋଇପଡିଛନ୍ତି । ତାଙ୍କ ପିତାଙ୍କ ଉପରେ ସମସ୍ତ ପ୍ରକାର ଦାଇତ୍ୱ ନ୍ୟସ୍ତ ହୋଇପଡିଛି । ଏହି ପରିବାର ଅତି ଗରୀବ ଅଟେ, ଏଣୁ ସରକାରୀ ସହାୟତା ପାଇଁ ଗ୍ରାମବାସୀ ତଥା ପରିବାର ଲୋକେ ଅନୁରୋଧ କରିଛନ୍ତି ।
