ସୁବର୍ଣ୍ଣପୁର : ଆଜି ସୋନପୁର ମହାବିଦ୍ୟାଳୟରେ ହିନ୍ଦୀ ଦିବସ ରାଜନୀତି ବିଭାଗର ମୁଖ୍ୟ ପ୍ରାଧ୍ୟାପକ ଲେଫ୍ଟନାଣ୍ଟ ଅନନ୍ତ ଦାସଙ୍କ ସଭାପତିତ୍ୱରେ ପାଳିତ ହୋଇଯାଇଛି । ଏହି ଅବସରରେ ହିନ୍ଦୀ ବିଭାଗର ମୁଖ୍ୟ ଅଧ୍ୟାପକ ଘନଶ୍ୟାମ ଖରସେଲ ସଭା କାର୍ଯ୍ୟ ପରିଚାଳନା କରିଥିବା ସ୍ଥଳେ ମୁଖ୍ୟବକ୍ତା ଭାବରେ ଶିକ୍ଷୟିତ୍ରୀ ଆରୁଣୀ ଦାନୀ ଏବଂ ସମ୍ମାନିତ ଅତିଥି ଭାବରେ ଅସିତ କୁମାର ପାଣିଗ୍ରାହୀ ଯୋଗ ଦେଇଥିଲେ । ହିନ୍ଦୀ ଭାଷାର ମହତ୍ତ୍ୱ ଏବଂ ବ୍ୟବହାରିକ ଦିଗ ଉପରେ ଆଲୋକପାତ କରି ମୁଖ୍ୟ ବକ୍ତା ଏବଂ ଅନ୍ୟ ବକ୍ତାଗଣ ନିଜର ବହୁମୂଲ୍ୟ ମତ ରଖିଥିଲେ । ମୁଖ୍ୟ ବକ୍ତା ହିନ୍ଦୀ ସଂଗୀତ ଗାନ କରିବା ସହିତ ଅଧ୍ୟାପକ ଡକ୍ଟର ମୀନକେତନ କୁମ୍ଭାର କବି ରବୀନ୍ଦ୍ର ଜୈନଙ୍କର ଜୀବନବାଦୀ କବିତା ଆବୃତ୍ତି କରିଥିଲେ । ଏହି ଅବସରରେ ଛାତ୍ରଛାତ୍ରୀଗଣ ନିଜସ୍ୱ ଅନୁଭୂତି ବଖାଣି ଥିଲେ । ଶେଷରେ ଓଡ଼ିଆ ଅଧ୍ୟାପକ ସରୋଜ କୁମାର ଜଗଦଲା ଧନ୍ୟବାଦ ଦେବା ସହିତ ସୋନପୁର ମହାବିଦ୍ୟାଳୟରେ ହିନ୍ଦୀ ସମ୍ମାନ ବିଷୟ ଭାବେ ନ ଥିବାରୁ ପ୍ରସଙ୍ଗ କ୍ରମେ ଦୁଃଖ ପ୍ରକାଶ କରିଥିଲେ, ଯଥା ସମ୍ଭବ ଏହି ଅଞ୍ଚଳରେ ହିନ୍ଦୀ ଭାଷାର ବିକାଶ ନିମିତ୍ତ ଏ ଦିଗରେ ପ୍ରଚେଷ୍ଟା କରାଯାଉ ବୋଲି ଆଶା ପ୍ରକଟ କରିଥିଲେ ।
