ହରଭଙ୍ଗା : ପୁରୁଣାକଟକ ଥାନା ଅନ୍ତର୍ଗତ ଖୋର୍ଦ୍ଧା -ବଲାଙ୍ଗୀର ୫୭ ନମ୍ବର ଜାତୀୟ ରାଜପଥ ପୁରୁଣାକଟକ ଏଚ୍ପି ଗ୍ୟାସ ଅଫିସ ସମ୍ମୁଖରେ ଏକ ମର୍ମନ୍ତୁଦ ସଡ଼କ ଦୁର୍ଘଟଣାରେ ଜଣେ ଯୁବକଙ୍କ ମୃତ୍ୟୁ ଘଟିଥିବା ଜଣାପଡିଛି । ସୂଚନା ମତେ ହରଭଙ୍ଗା ବ୍ଲକ୍ ପିତାମ୍ବରପୁର ପଂଚାୟତ ଅନ୍ତର୍ଗତ କାନପୁର ଗ୍ରାମର ସୁକାନ୍ତ ଭୋଇ (୨୫) କୌଣସି କାର୍ଯ୍ୟରେ ଯାଇ ଏକ ବାଇକ୍ ସାହାଯ୍ୟ ରେ ନିଜ ସାଙ୍ଗଙ୍କ ସହିତ ଘରକୁ ଫେରୁଥିବା ସମୟରେ ପୁରୁଣାକଟକ ବଜାର ଏଚପି ଗ୍ୟାସ ଅଫିସ ସମ୍ମୁଖରେ ଆଜି ଅପରାହ୍ନ ପ୍ରାୟ ୬ ଘଣ୍ଟା ସମୟରେ ପଛ ପଟୁ ଆସୁଥିବା ଏଆରଏସଏସ କମ୍ପାନୀର ଏକ ହଇୱା ତାଙ୍କୁ ଧକ୍କା ଦେଇଥିଲା । ଫଳରେ ଘଟଣା ସ୍ଥଳରେ ହିଁ ସୁକାନ୍ତଙ୍କ ମୃତ୍ୟୁ ହୋଇଥଲା ଓ ତାଙ୍କ ସାଙ୍ଗ ମଧ୍ୟ ଗୁରୁତର ହେଇଥିଲେ । ଘଟଣା ସ୍ଥଳରେ ପୁରୁଣାକଟକ ଥାନା ଅଧିକାରୀ ରଞ୍ଜିତ କୁମାର ମୁନି ଓ କର୍ମଚାରୀ ପହଞ୍ଚି ଦୁର୍ଘଟଣାର ତଦନ୍ତ କରିବା ସହିତ ଶାରଦୀୟ ଦୁର୍ଗା ପୂଜା ଏବଂ ଜନଗହଳି ସ୍ଥାନରେ ଆଜିଠୁ ସମ୍ପୂର୍ଣ୍ଣ କଡ଼ା କଡି ଭାବେ ଟ୍ରାଫିକ ନିୟନ୍ତ୍ରଣ ବ୍ୟବସ୍ଥା ପୁରୁଣାକଟକ ବଜାର , ଚାରିଛକରେ କରାଯିବ ବୋଲି ସୂଚନା ଦେଇଛନ୍ତି । ଅନ୍ୟ ପଟେ ଏଆରଏସଏସ କମ୍ପାନୀ ଡ୍ରାଇଭରଙ୍କର ବେପରୁଆ ଗାଡ଼ି ଚାଳନା ଯୋଗୁଁ ଏକ ନିରୀହ ଯୁବକଙ୍କ ମୃତ୍ୟୁ ହୋଇଥିବା ନେଇ ପୁରୁଣାକଟକ ଅଞ୍ଚଳରେ ଉତ୍ତେଜନା ପ୍ରକାଶ ପାଇବା ସହିତ କ୍ଷତିପୂରଣ ଦାବି କରୁଥିବା ଜଣାପଡିଛି ।
