ପୁରୀ : ବଲିଉଡର ପ୍ରସିଦ୍ଧ କଣ୍ଠ ଶିଳ୍ପୀ ଶଙ୍କର ମହାଦେବନ ପୁରୀ ଆସି ଶ୍ରୀମନ୍ଦିରରେ ମହାପ୍ରଭୁଙ୍କୁ ଦର୍ଶନ କରିଛନ୍ତି । ଶଙ୍କର ମହାଦେବନ ପ୍ରଥମେ ପ୍ରଭୁ ପତିତପାବନଙ୍କୁ ପ୍ରଣାମ କରି ଶ୍ରୀମନ୍ଦିରକୁ ପ୍ରବେଶ କରିଥିଲେ । ଶ୍ରୀମନ୍ଦିର ରତ୍ନ ସିଂହାସନରେ ପ୍ରଭୁ ଜଗନ୍ନାଥଙ୍କୁ ଦର୍ଶନ କରିଥିଲେ । ପରେ ଭିତରେ ବେଢ଼ା ପରିକ୍ରମା କରିବା ସହ ବିଭିନ୍ନ ଦେବାଦେବୀ ମନ୍ଦିର ଯାଇ ଦର୍ଶନ ସହ ପୂଜାର୍ଚ୍ଚନା କରିଥିଲେ । ତେବେ ଶ୍ରୀମନ୍ଦିରରୁ ବାହାରି ଗଣମାଧ୍ୟମକୁ ପ୍ରତିକ୍ରିୟା ଦେଇ ଶଙ୍କର କହିଥିଲେ ଦୀର୍ଘ ଦିନ ହେଲା ତାଙ୍କ ପରିବାରର ସ୍ୱପ୍ନ ଥିଲା ପୁରୀ ଆସି ମହାପ୍ରଭୁଙ୍କୁ ଦର୍ଶନ କରିବେ । କିନ୍ତୁ ଏହା ସମ୍ଭବ ହେଉ ନଥିଲା । ତେବେ କାଳିଆର ଡାକରା ମିଳିବା ପରେ ସେ ପୁରୀ ଆସି ମହାପ୍ରଭୁଙ୍କୁ ଦର୍ଶନ କରିଥିବା କଣ୍ଠଶିଳ୍ପୀ ଶଙ୍କର ମହାଦେବନ କହିଛନ୍ତି । ତେବେ ଅଯୋଧ୍ୟାରେ ରାମ ମନ୍ଦିର ପ୍ରତିଷ୍ଠା, ପୁରୀରେ ଶ୍ରୀଜଗନ୍ନାଥ ମନ୍ଦିର ପରିକ୍ରମା ପ୍ରକଳ୍ପ ପ୍ରତିଷ୍ଠା ଏକ ଅନନ୍ୟ ଦିବ୍ୟ ସମୟ ଭକ୍ତଙ୍କ ପାଇଁ ବୋଲି ସେ କହିଥିଲେ । ତେବେ ଶ୍ରୀମନ୍ଦିର ପରିକ୍ରମା ପ୍ରକଳ୍ପ କାର୍ଯ୍ୟକୁ ସେ ପ୍ରଶଂସା କରିଥିଲେ । ଏହା ଦ୍ୱାରା ଭକ୍ତ ମାନେ ଆହୁରି ଅଧିକ ସୁବିଧାସୁଯୋଗ ପାଇବେ । ତେବେ ଶେଷରେ ମହାପ୍ରଭୁଙ୍କ ଉଦେଶ୍ୟରେ ଜୟ ଜଗନ୍ନାଥ ସଙ୍ଗୀତ ଗାନ କରିଥିଲେ । ତାଙ୍କ ସହିତ ଭକ୍ତମାନେ ମଧ୍ୟ ସଂଗୀତ ଗାନ କରିଥିଲେ । ତେବେ ପ୍ରଭୁ ଜଗନ୍ନାଥ ସାରା ବିଶ୍ୱ ବାସୀଙ୍କ କଲ୍ୟାଣ କରନ୍ତୁ ବୋଲି ସେ ପ୍ରାର୍ଥନା କରିଥିବା କହିଥିଲେ । ମହାପ୍ରଭୁଙ୍କ ଦର୍ଶନ ପାଇ ସେ ବହୁତ ଖୁସି ଥିବା କହିଥିଲେ ବଲିଉଡ୍ ପ୍ରସିଦ୍ଧ କଣ୍ଠଶିଳ୍ପୀ ଶଙ୍କର ମହାଦେବନ ।
