ହରଭଙ୍ଗା :ବୌଦ୍ଧ ଜିଲ୍ଲା ହରଭଙ୍ଗା ଥାନା ପକ୍ଷରୁ ଉପାନ୍ତ ଅଂଚଳରେ ଫ୍ଲାଗମାର୍ଚ୍ଚ କାର୍ଯ୍ୟକ୍ରମ ମଙ୍ଗଳବାର କରାଯାଇଛି । ବ୍ଲକର ଉପାନ୍ତ ଅଂଚଳ ସାତଖଣ୍ଡ, ହିଞ୍ଜଳ, କୁଟିବାରୀ, ଜାବର, ମହାଲିକପଡା ସହିତ ଶଙ୍କୁଲେଇ, ଛତରଙ୍ଗ, ଶଙ୍କରଡା, ବୁଲୁରା ଓ ମଲିକପଡା ଆଦି ବିଭିନ୍ନ ଗ୍ରାମରେ ହରଭଙ୍ଗା ଥାନା ପୋଲିସ ଓ ଆଇଆରବି ପକ୍ଷରୁ ଫ୍ଲାଗମାର୍ଚ୍ଚ କରାଯିବା ସହ ବିପୁଳ ମାତ୍ରରେ ଭୋଟ ଦେବାପାଇଁ ଭୋଟର ମାନଙ୍କୁ ସଚେତନତା କରଯାଇଥିଲା । ବିନା ଚାପରେ, କୌଣସି ପ୍ରଲୋଭନର ବଶବର୍ତ୍ତୀ ନହୋଇ ମୁକ୍ତ, ଅବାଧ ନିର୍ବାଚନ ପାଇଁ ଆସନ୍ତା ୨୦ ତାରିଖ ଦିନ ସାମିଲ ହୋଇ ଅଧିକ ସଂଖ୍ୟାରେ ଭୋଟ ପ୍ରଦାନ କରିବା ସହିତ ସ୍ୱଚ୍ଛ, ଦୁର୍ନୀତି ମୁକ୍ତ ଓ ନିରପେକ୍ଷ ନିର୍ବାଚନ ପରିଚାଳନାରେ ପ୍ରଶାସନକୁ ସହଯୋଗ କରିବାକୁ ଜନସାଧାରଣଙ୍କୁ ମଧ୍ୟ ଅନୁରୋଧ କରାଯାଇଥିଲା । ଉକ୍ତ କାର୍ଯ୍ୟକ୍ରମ ବୌଦ୍ଧ ଏସଡିପିଓ କୁଲଦୀପ ମୀନାଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ହରଭଙ୍ଗା ଥାନା ପୋଲିସ ଓ ଆଇଆରବି ଯବାନମାନେ ଫ୍ଲାଗମାର୍ଚ୍ଚ ଓ ଭୋଟର ସଚେତନତା କାର୍ଯ୍ୟକ୍ରମରେ ସାମିଲ ହୋଇଥିବା ଥାନା ଅଧିକାରୀ ନଳିନୀ କାନ୍ତ ଦାସ ସୂଚନା ଦେଇଛନ୍ତି ।
