ପାଟଣା: କେନ୍ଦୁଝର ଜିଲା ପାଟଣା ବ୍ଲକ ରାଜନଗର ରଘୁନାଥ ଜୀଉ ମଠ ସଂଲଗ୍ନ ବୈତରଣୀ ନଦୀ ଘାଟରେ ବୁଧବାର ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ମକର ସଂକ୍ରାନ୍ତିରେ ବୁଡ ପକାଇବେ। ଏ ନେଇ ଜିଲାପାଳଙ୍କ କାର୍ଯ୍ୟାଳୟ ପକ୍ଷରୁ ପତ୍ର ସଂଖ୍ୟା ୧୧୮/୨୬ରେ ବିଭିନ୍ନ ଅଧିକାରୀଙ୍କୁ ଦାୟିତ୍ୱ ବଣ୍ଟନ କରାଯାଇଛି। ଓଭର ଅଲ ସୁପର ଭିଜନ ପାଇଁ ଉପ ଜିଲାପାଳ ଉମାଶଙ୍କର ଦଳେଇ, ବୈତରଣୀ ନଦୀ ଘାଟ ପାଇଁ ପାଟଣା ତହସିଲ ଦାର ଅଶ୍ୱିନୀ କୁମାର ନାଏକ, ମଠ ପାଇଁ ବିଡିଓ ମାନସ କୁମାର ଦଣ୍ଡପାଟ, ଚେଞ୍ଜିଂ ରୁମ ଦାୟିତ୍ୱରେ ପାଟଣା ଅତିରିକ୍ତ ତହସିଲଦାର ଶରଣ କୁମାର ଜେନା ପ୍ରମୁଖ ରହିବେ। ଏ ନେଇ ପ୍ରଶାସନ ପକ୍ଷରୁ ତତ୍ପରତା ପ୍ରକାଶ ପାଇବା ସହ ପ୍ରସ୍ତୁତି ଚୂଡାନ୍ତ ପର୍ଯ୍ୟାୟରେ ପହଞ୍ଚିଛି।
ସୋମବାର ଜିଲା ଆରକ୍ଷୀ ଅଧିକ୍ଷକ ନୀତିନ କୁଶଲକର ଦାଗୁଡୁ, ଚମ୍ପୁଆ ଅତିରିକ୍ତ ଜିଲାପାଳ ଉମାକାନ୍ତ ପରିଡା, ପାଟଣା ବିଡିଓ ମାନସ କୁମାର ଦଣ୍ଡ ପାଟ, ପାଟଣା ତହସିଲଦାର ଅଶ୍ୱିନୀ କୁମାର ନାଏକ, ତୁରୁମୁଙ୍ଗା ଥାନା ଅଧିକାରୀ ଦୀପ୍ତି ରଞ୍ଜନ ସାହୁ ,ରାଜନଗର ସରପଞ୍ଚ ସୁଧାଂଶୁଶେଖର ନାୟକ ଉପସ୍ଥିତ ଥାଇ ବିଭିନ୍ନ କାର୍ଯ୍ୟ ର ତଦାରଖ କରିଛନ୍ତି। ପାଟଣା ଅଗ୍ନିଶମ ବାହିନୀ ତରଫରୁ ଅଗ୍ନିଶମ ଅଧିକାରୀ ଗୌର ହେମ୍ରମଙ୍କ ନେତୃତ୍ୱରେ ବୁଡାଳିମାନେ ବୁଡ ପକାଇବା ସ୍ଥାନ ବୈତରଣୀ ନଦୀ ପାଣିରେ ପଶି ଯାଞ୍ଚ କରିଚନ୍ତି।
