ନୂଆଦିଲ୍ଲୀ,୨୦।୨: ଆଇସିସି ୧୯ ବର୍ଷରୁ କମ ବିଶ୍ୱକପ ୨୦୨୬ରେ ଟିମ ଇଣ୍ଡିଆକୁ ଟାଇଟଲ ଦେବା ପରେ ଜିମ୍ବାୱେ ଏବଂ ନାମ୍ବିଆରୁ ଫେରିଥିବା ବୈଭବ ସୂର୍ଯ୍ୟବଂଶୀ ବର୍ତ୍ତମାନ ରାଜସ୍ଥାନ ରୟାଲ୍ସ ସହିତ ପ୍ରଶିକ୍ଷଣ ଶିବିରରେ ଅଛନ୍ତି। ସେ ଆଇପିଏଲ ୨୦୨୬ ପାଇଁ ନିଜକୁ ପ୍ରସ୍ତୁତ କରୁଛନ୍ତି। ବରିଷ୍ଠ ଭାରତୀୟ ଦଳର ଜର୍ସି ପିନ୍ଧି ଭବିଷ୍ୟତରେ ବିଶ୍ୱକପ କିମ୍ବା ଟି୨୦ ବିଶ୍ୱକପ ରେ ତାଙ୍କ ଦେଶ ପାଇଁ ଖେଳିବା ତାଙ୍କର ପ୍ରକୃତ ଲକ୍ଷ୍ୟ। ସେହି ସ୍ବପ୍ନକୁ ପୂରଣ କରିବା ପାଇଁ, ବୈଭବ ଏକ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନେଇଛନ୍ତି। ସେ ମଟନ ଏବଂ ଚିକେନ ଖାଇବା ଛାଡ଼ି ଦେଇଛନ୍ତି।
ବୈଭବଙ୍କ ପିତା ସଞ୍ଜୀବ ସୂର୍ଯ୍ୟବଂଶୀ ଏକ ସାକ୍ଷାତକାରରେ ପ୍ରକାଶ କରିଛନ୍ତି ଯେ, ତାଙ୍କ ପୁଅ ଏବେ ମଟନ ଏବଂ ଚିକେନ ଖାଇବା ଛାଡ଼ି ଦେଇଛି। ଏହି ଗୁରୁତ୍ୱପୂର୍ଣ୍ଣ ନିଷ୍ପତ୍ତି ପଛରେ ବୈଭବଙ୍କ ଫିଟନେସ ସହିତ ଜଡିତ କାରଣ। ଟିମ ଇଣ୍ଡିଆର ସିନିୟର ଦଳରେ ଯଥାଶୀଘ୍ର ସ୍ଥାନ ପାଇବା ଏବଂ ୨୦୨୮ ଟି-୨୦ ବିଶ୍ୱକପରେ ଖେଳିବା ପାଇଁ, ଫର୍ମ ଏବଂ ଫିଟନେସ ଉଭୟ ଜରୁରୀ। ବୈଭବ ମଟନ ଏବଂ ଚିକେନକୁ ବହୁତ ଭଲ ପାଆନ୍ତି। କିନ୍ତୁ କ୍ୟାରିୟର ପାଇଁ ସେ ତାଙ୍କର ପ୍ରିୟ ଖାଦ୍ୟ ଛାଡିବାକୁ ସଂକୋଚ କରି ନାହାନ୍ତି। ବୈଭବ ଏବେ ନିରାମିଷ ଭୋଜନକୁ ପ୍ରାଥମିକତା ଦେଉଛନ୍ତି। ସେ ମଟନ ଏବଂ ଚିକେନରୁ ଡାଲି ଏବଂ ସବୁଜ ପନିପରିବା ଆଡକୁ ପରିବର୍ତ୍ତନ କରିଥିବା ତାଙ୍କ ବାପା କହିଛନ୍ତି।
ଟିମ ଇଣ୍ଡିଆର ସିନିୟର ଦଳରେ ବୈଭବଙ୍କ ସାମିଲ ନେଇ ତାଙ୍କ ବାପା କହିଛନ୍ତି, ତାଙ୍କ ପୁଅ ପ୍ରସ୍ତୁତ। ତାଙ୍କୁ କେବେ ସୁଯୋଗ ଦିଆଯିବ ତାହା ଏବେ ଭାରତୀୟ କ୍ରିକେଟ ନିୟନ୍ତ୍ରଣ ବୋର୍ଡ (BCCI) ଉପରେ ନିର୍ଭର କରେ।
