ସମ୍ବଲପୁର: ଉପରମୁଣ୍ଡ ଅଞ୍ଚଳରେ ବର୍ଷାର ପ୍ରକୋପ କମିଥିବାରୁ ସମ୍ବଲପୁରସ୍ଥିତ ହୀରାକୁଦ ଜଳଭଣ୍ଡାରର ଜଳସ୍ତର ଧୀରେ ଧୀରେ ହ୍ରାସ ପାଉଛି। ବର୍ତ୍ତମାନ ଜଳଭଣ୍ଡାରର ଜଳସ୍ତର ୬୧୮.୭୧ ଫୁଟ ରହିଥିବା ସୂଚନା ମିଳିଛି।
ବର୍ତ୍ତମାନ ହୀରାକୁଦ ଡ୍ୟାମର ୧୩ଟି ଗେଟ୍ ଦେଇ ବନ୍ୟାଜଳ ନିଷ୍କାସନ କରାଯାଉଛି। ଏଥିମଧ୍ୟରୁ ବାମ ପାର୍ଶ୍ୱର ୯ଟି ଓ ଡାହାଣ ପାର୍ଶ୍ୱର ୪ଟି ଗେଟ୍ ଖୋଲା ରହିଛି। ଜଳଭଣ୍ଡାରକୁ ୯୦,୭୩୧ କ୍ୟୁସେକ୍ ଜଳ ପ୍ରବେଶ କରୁଥିବା ବେଳେ ୨,୩୮,୫୦୮ କ୍ୟୁସେକ୍ ଜଳ ନିଷ୍କାସନ କରାଯାଉଛି।
ଯଦିଓ ରାଜ୍ୟରେ ବନ୍ୟା ପରିସ୍ଥିତିରେ ଧୀରେ ଧୀରେ ସୁଧାର ଆସୁଛି, ତଥାପି ଜଳସମ୍ପଦ ବିଭାଗ ହୀରାକୁଦର ସ୍ଥିତି ଉପରେ କଡ଼ା ନଜର ରଖିଛି। ଉପରମୁଣ୍ଡରୁ ଜଳ ପ୍ରବେଶ ଜାରି ରହିଥିବାରୁ ପରିସ୍ଥିତିକୁ ଲଗାତାର ସମୀକ୍ଷା କରାଯାଉଛି।
ଏହାସହ ମହାନଦୀର ତଳମୁଣ୍ଡରେ ଥିବା ଜିଲ୍ଲାଗୁଡ଼ିକୁ ସତର୍କ ରହିବାକୁ ପ୍ରଶାସନ ପକ୍ଷରୁ ପରାମର୍ଶ ଦିଆଯାଇଛି। ବନ୍ୟା ନିୟନ୍ତ୍ରଣରେ ହୀରାକୁଦ ଡ୍ୟାମର ଗୁରୁତ୍ୱପୂର୍ଣ୍ଣ ଭୂମିକା ଥିବାରୁ ପ୍ରତ୍ୟେକ ଜଳସ୍ତର ପରିବର୍ତ୍ତନ ଉପରେ ସରକାରଙ୍କ ତୀକ୍ଷ୍ଣ ନଜର ରହିଛି।
