ପାରଳାଖେମୁଣ୍ଡି,୧୩/୯- ଗଜପତି ଜିଲ୍ଲା ମୋଟର କର୍ମଚାରୀ ସଂଘର ନୂତନ ସଭାପତି ଭାବେ ପୂର୍ବତନ ନଗର ପାଳ ନୃସିଂହ ଚରଣ ପଟ୍ଟନାୟକ ଚୟନ ହୋଇଛନ୍ତି । ପୂର୍ବତନ ସଭାପତି ପି କ୍ରିଷ୍ଣାଙ୍କ ଦେହାନ୍ତ ପରେ ଏହି ପଦବୀଟି ଖାଲି ପଡିଥିଲା । ଏହି କାର୍ଯ୍ୟକ୍ରମରେ ପାରଳା ବିଧାୟକ କେ ନାରାୟଣ ରାଓ ଯୋଗ ଦେଇ ଶୁଭେଚ୍ଛା ଜଣାଇଥିଲେ । ସେହିପରି ପୂର୍ବତନ ସଭାପତି ପି କ୍ରିଷ୍ଣାଙ୍କୁ ଶ୍ରଦ୍ଧାଞ୍ଜଳି ଦିଆଯାଇଥିଲା । ନୂତନ ଭାବେ ସଭାପତି ହେବା ପରେ ଶ୍ରୀ ପଟ୍ଟନାୟକ ସଙ୍ଘର ଉନ୍ନୟନ ପାଇଁ ନିଃସ୍ୱାର୍ଥପର ଭାବେ କାର୍ଯ୍ୟକରିବେ ବୋଲି କହିଥିଲେ । ସେହିପରି ସଂଘ କିପରି ଅଧିକ ସକ୍ରିୟ ହେବ ସେ ଦିଗକୁ ମଧ୍ୟ ଦୃଷ୍ଟି ଦିଆଯିବ ବୋଲି ଗଣମାଧ୍ୟମକୁ ସୂଚନା ଦେଇଛନ୍ତି । ତାଙ୍କୁ ବିଭିନ୍ନ ମହଲରୁ ସ୍ୱାଗତ ଜଣାଯାଇଛି ।
