ଦିଗପହଣ୍ଡି :ଦିଗପହଣ୍ଡି ଥାନା ଚାମୁଣ୍ଡେଶ୍ୱରୀ ମନ୍ଦିର ନିକଟରେ ଏକ ମର୍ମନ୍ତୁଦ ସଡକ ଦୁର୍ଘଟଣା ଘଟିଛି । ଏଥିରେ ଜଣେ ପ୍ରାଣ ହରାଇଥିବା ବେଳେ ୨ ଜଣ ଆହତ ହୋଇଛନ୍ତି । ଗତକାଲି ଅପରାହ୍ନରେ ଦୁଇଟି ମୋଟର ସାଇକେଲ ମୁହାଁମୁହିଁ ଧକ୍କା ହେବା ଫଳରେ ଚିକିଟି ବ୍ଲକ କେ.ନୂଆଗାଁ ଅନ୍ତର୍ଗତ ବି. ନୂଆପଡା ଗ୍ରାମର ବୁଢା ଗୌଡ଼ଙ୍କ ମୃତ୍ୟୁ ହୋଇଥିବା ବେଳେ ଦିଗପହଣ୍ଡି ଥାନା ଅନ୍ତର୍ଗତ ଜଳମେରିପଲ୍ଲି ଗ୍ରାମର ବିକାଶ ବିଶ୍ୱାଳ ଓ ପାଟପୁର ଥାନା ଅନ୍ତର୍ଗତ ଧର୍ମପୁର ଗ୍ରାମର ଶଙ୍କର ପାତ୍ର ଗୁରୁତର ଆହତ ହୋଇଥିବା ଖବର ମିଳିଛି । ସୂଚନାନୁଯାୟୀ ଗୁରୁବାର ପୂର୍ବାହ୍ନରେ ବୁଢା ନିଜ ମୋଟର ସାଇକେଲ (ଓଡି ୦୭ କେ ୩୪୮୨) ଯୋଗେ ଦିଗପହଣ୍ଡି ନିକଟସ୍ଥ ସୁଣ୍ଡିପଲ୍ଲୀ ଗ୍ରାମ ସମ୍ପର୍କୀୟଙ୍କ ଭୋଜିକୁ ଆସି ନିଜ ଗ୍ରାମକୁ ଫେରିବା ବେଳେ ଜଳମରିପଲ୍ଲୀ ନିଜ ମାମୁଁଙ୍କ ଘରେ ରହୁଥିବା ଶଙ୍କର ଓ ବିକାଶ (ଓଡି ୦୭ ଜେଡ ୪୫୧୭)ଯୋଗେ ଦିଗପହଣ୍ଡି ଅଭିମୁଖେ ଯାଉଥିବା ବେଳେ ମୁହାଁମୁହିଁ ଧକ୍କା ହୋଇଥିବା ସୂଚନା ମିଳିଛି । ନିକଟସ୍ଥ କିଛି ଲୋକ ୧୦୮ ଆମ୍ବୁଲାନ୍ସ ଯୋଗେ ନିକଟସ୍ଥ ଦିଗପହଣ୍ଡି ସ୍ୱାସ୍ଥ୍ୟ କେନ୍ଦ୍ରକୁ ନେଇଥିଲେ କିନ୍ତୁ ଡାକ୍ତର ବୁଢା ଗୌଡକୁ ମୃତ ଘୋଷଣା କରିଥିବା ବେଳେ ଅନ୍ୟ ୨ଜଣକୁ ପ୍ରାଥମିକ ଚିକିତ୍ସା ପରେ ବ୍ରହ୍ମପୁର ବଡ଼ମେଡିକଲକୁ ସ୍ଥାନାନ୍ତରିତ କରିଥିଲେ ।ଘଟଣା ସ୍ଥଳରେ ଦିଗପହଣ୍ଡି ଥାନା ପୋଲିସ ସ୍ୱାସ୍ଥ୍ୟ କେନ୍ଦ୍ରରେ ପହଁଚି ତଦନ୍ତ ଜାରି ରଖିଥିବା ବେଳେ ମୃତଦେହକୁ ଜବତ କରି ଏକ ମକଦ୍ଦମା ରୁଜୁ କରି ତଦନ୍ତ ଚଳାଇଥିବା ବେଳେ ଶବ ବ୍ୟବଚ୍ଛେଦ ନିମନ୍ତେ ବ୍ରହ୍ମପୁର ଶବଗୃହକୁ ପଠାଯିବ ବୋଲି ଥାନା ଅଧିକାରୀ ବସନ୍ତ କୁମାର ସେଠୀ ସୂଚନା ଦେଇଛନ୍ତି ।
