ସୁବର୍ଣ୍ଣପୁର ୨୩/୭- ସୁବର୍ଣ୍ଣ ପୁର ଜିଲ୍ଲା କୋଟସମଲାଇସ୍ଥିତ ପାତାଳି ଶ୍ରୀ କ୍ଷେତ୍ରରେ ନବଦିନାତ୍ମକ ଯାତ୍ରା ସାରି ଶ୍ରୀଜୀଉମାନଙ୍କ ମନ୍ଦିର ବିଜେ ସମାପନ ହୋଇଛି । ପ୍ରଥମେ ରଥ ଅବତରଣ ପରେ ଛଳିଆ କନ୍ଦର ଶ୍ରୀ ମନ୍ଦିର ଅଭିମୁଖେ ଗୋଟି ପହଣ୍ଡିରେ ବିଜେ କରିଛନ୍ତି ଚତୁର୍ଦ୍ଧାମୂର୍ତ୍ତି । ସେବାୟତ ମାନଙ୍କ ଦ୍ୱାରା ଛତି, ଛତ୍ର, ଆଲଟ, ଚାମର ସେବା କରାଯାଇଥିବା ବେଳେ ପହଣ୍ଡି ଗୀତ -ଲକ୍ଷ୍ମଣ ନାୟକ, ସୁଧୀର ପୁରୋହିତ, ଅନିରୁଦ୍ଧ ପାଢ଼ୀ ପ୍ରମୁଖ ଗାନ କରିଥିଲେ । ସେହିପରି ଲକ୍ଷ୍ମୀନାରାୟଣ କଳି ଗୀତ -ଶ୍ରୀରାମ ପଣ୍ଡା, ବିଶ୍ୱେଶ୍ୱର ପାଢ଼ୀଙ୍କ ଦ୍ୱାରା ସମାପନ ହୋଇଥିଲା । ବିଶେଷ ଭାବରେ ଆଜି ଶ୍ରୀଜିଉଙ୍କ ଠାରେ ରସଗୋଲା ଭୋଗ ଲାଗିହୋଇଥିଲା । କରୋନା କଟକଣା ଯୋଗୁଁ ସୀମିତ ସେବାୟତ ଙ୍କ ଦ୍ୱାରା ସମସ୍ତ, ରୀତିନୀତି ସମ୍ପାଦିତ ହୋଇଥିବା ବେଳେ କୋଭିଡ଼ କଟକଣା ଯୋଗୁଁ ମହାପ୍ରଭୁଙ୍କ ଏ ଦିବ୍ୟଲୀଳାକୁ ଦର୍ଶନ କରିନପାରି ଭକ୍ତ ଓ ଶ୍ରଦ୍ଧାଳୁ ନିରାଶ ହୋଇଛନ୍ତି ।
