ପୁରୀ : କୋଣାର୍କ ଯାତ୍ରୀ ନିବାସ ପରିସରରେ ପୁରୀ ଜିଲ୍ଲା ବିଜେଡିର ପରିବର୍ଦ୍ଧିତ କାର୍ଯ୍ୟକାରିଣୀ ବୈଠକ ଅନୁଷ୍ଠିତ ହୋଇଯାଇଛି । ଏହି ବୈଠକକୁ ଜିଲ୍ଲା ବିଜେଡ଼ି ଦଳର ସଭାପତି ମହେଶ୍ୱର ମହାନ୍ତି ଆନୁଷ୍ଠାନିକ ଭାବରେ ଉଦ୍ଘାଟିତ କରିଥିଲେ । ଏଥିରେ ପୁରୀ ଜିଲ୍ଲାର ୬ ଗୋଟି ନିର୍ବାଚନ ମଣ୍ଡଳୀର ବିଧାୟକ ଓ ମନ୍ତ୍ରୀଙ୍କ ସହିତ ରାଜ୍ୟର କେତେକ ମନ୍ତ୍ରୀ ମଧ୍ୟ ଯୋଗ ଦେଇଥିଲେ । ବିଜେଡି ଦଳ ତାର କାର୍ଯ୍ୟ କିପରି ତୃଣମୂଳସ୍ତରରୁ କରାଯିବ ସେ ସମ୍ବନ୍ଧରେ ବିଶଦ୍ ଭାବରେ ଆଲୋଚନା ଓ ପର୍ଯ୍ୟାଲୋଚନା କରା ଯାଇଥିଲା । ଆଗକୁ ବିଜେଡି ଦଳ ପଞ୍ଚାୟତ ନିର୍ବାଚନକୁ ଯାଉଥିବାରୁ କିପରି ସାଧାରଣ ଲୋକଙ୍କ ନିକଟରେ ପହଁଚିବ ଏବଂ ନବୀନ ସରକାରଙ୍କ କାର୍ଯ୍ୟାଧାରା ସହିତ ବିକାଶ ବାର୍ତ୍ତା ଦେବ ସେ ସଂପର୍କରେ ମଧ୍ୟ ଆଲୋଚନା କରାଯାଇଥିଲା । ଅନ୍ୟ ପକ୍ଷରେ ସାଧାରଣ ଲୋକମାନେ ବିଜେଡି ଶାସନ ସମୟରେ ସମସ୍ତ ପ୍ରକାରର ବିକାଶମୂଳକ ଯୋଜନା ପାଉଥିବାରୁ ନିଶ୍ଚିତ ଭାବରେ ଦଳର ସମର୍ଥିତ ପ୍ରାର୍ଥୀମାନଙ୍କୁ ବିପୁଳ ଭାବରେ ବିଜୟୀ କରାଇବେ ବୋଲି ଆମେ ଆଶାବାଦୀ ବୋଲି ଗଣଶିକ୍ଷାମନ୍ତ୍ରୀ ସମୀର ରଞ୍ଜନ ଦାଶ କହିଥିଲେ । ଜିଲ୍ଲା କାର୍ଯ୍ୟକାରିଣୀ ପରିବର୍ଦ୍ଧିତ ବୈଠକରେ ଜିଲ୍ଲା ସଭାପତି ମହେଶ୍ୱର ମହାନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସରକାର ସମୟରେ ଆମେ ଓ ଆମ ନେତା ନବୀନ ବାବୁ ସୁଖଦୁଃଖରେ ରହିଥିବାରୁ ନିଶ୍ଚିତ ସାଧାରଣ ଲୋକ ଆମମାନଙ୍କ ସହ ଅଛନ୍ତି ବୋଲି ମତ ରଖିଥିଲେ ।
