ବେଜିଂ: ଚୀନରେ କରୋନା ତାଣ୍ଡବ ରଚୁଛି । ଗତ ୨୪ଘଣ୍ଟାରେ ଦେଶରେ ରେକର୍ଡ ସଂଖ୍ୟକ ୧୬ହଜାର ୪୧୨ କରୋନା ସଂକ୍ରମିତ ଚିହ୍ନଟ ହୋଇଛନ୍ତି । କରୋନା ମହାମାରୀ ଆରମ୍ଭ ହେବା ଦିନଠାରୁ ଚୀନରେ ଗୋଟିଏ ଦିନରେ ଏତେ ସଂଖ୍ୟକ ସଂକ୍ରମିତ ଚିହ୍ନଟ ହୋଇନଥିଲେ । ଚୀନର ‘ଜିରୋ କୋଭିଡ’ ଷ୍ଟ୍ରାଟେଜୀ ବିଫଳ ହେବାର ଲାଗିଛି । ଦେଶର ସବୁ ପ୍ରଦେଶକୁ ମହାମାରୀ ବ୍ୟାପି ସାରିଛି । ଦେଶର ଆର୍ଥିକ ରାଜଧାନୀ ବୋଲାଉଥିବା ସାଂଘାଇରେ ସଂକ୍ରମିତଙ୍କ ସଂଖ୍ୟା ସର୍ବାଧିକ ରହିଛି । ସାଂଘାଇରେ ରହୁଥିବା ସମସ୍ତ ୨.୬କୋଟି ଲୋକଙ୍କର କରୋନା ପରୀକ୍ଷା କରାଯାଇଛି ।ଜରୁରୀ ସ୍ୱାସ୍ଥ୍ୟ ସେବା ବ୍ୟତୀତ ଅନ୍ୟ କୌଣସି କାର୍ଯ୍ୟ ପାଇଁ ଲୋକଙ୍କୁ ଘରୁ ବାହାରିବା ଉପରେ ସଂପୂର୍ଣ୍ଣ ପ୍ରତିବନ୍ଧକ ଲଗାଯାଇଛି । ଏଥିନିମନ୍ତେ ସାଂଘାଇରେ ୨ହଜାରରୁ ଅଧିକ ସେନା କର୍ମଚାରୀଙ୍କୁ ମଧ୍ୟ ମୁତୟନ କରାଯାଇଛି । ସମସ୍ତ ହସ୍ପିଟାଲ ଏବଂ ଆଇସୋଲେସନ ସେଣ୍ଟର ରୋଗୀଙ୍କ ଦ୍ୱାରା ଭରି ରହିଛି । ଚୀନରେ କୋଟି କୋଟି ଲୋକ ମାସେରୁ ଅଧିକ ହେବ ଗୃହବନ୍ଦୀ ହୋଇ ଜୀବନ ବିତାଉଛନ୍ତି ।
