ପାଟଣାଗଡ଼,୧୧/୪- ପାଟଣାଗଡ ବ୍ଳକ ଅନ୍ତର୍ଗତ ସୁନାମୁଦିସ୍ଥିତ ବାପୁଜୀ ହାଇସ୍କୁଲରେ ଆଜି ସକାଳ ୭ ଟା ସମୟରେ ପ୍ରାର୍ଥନା ସମୟରେ ୭ଜଣ ଛାତ୍ରୀ ଅସୁସ୍ଥ ହୋଇପଡିଥିଲେ । ସେମାନଙ୍କୁ ସଙ୍ଗେସଙ୍ଗେ ଆମ୍ବୁଲାନସ ଯୋଗେ ପାଟଣାଗଡ ଡାକ୍ତରଖାନାରେ ଭର୍ତ୍ତି କରାଯାଇଥିଲା । ଛାତ୍ରୀମାନେ ଏବେ ସୁସ୍ଥ ଥିବା ଜଣାପଡିଛି । ପ୍ରାପ୍ତ ଖବରରୁ ପ୍ରକାଶ ଯେ ଆଜି ପ୍ରାର୍ଥନା କ୍ଲାସ ସମୟରେ କିଛି ଛାତ୍ରୀ ଡେରିରେ ଆସି ପ୍ରାର୍ଥନାରେ ଯୋଗଦେବାରୁ ଜନୈକ ଶିକ୍ଷକ ବସ୍ଉଠ୍ ହେବାପାଇଁ କହିଥିଲେ । ପ୍ରାର୍ଥନା କ୍ଲାସରେ ୬୦ ଜଣ ଛାତ୍ରୀ ଉପସ୍ଥିତ ଥିବାବେଳେ ସେମାନଙ୍କ ମଧ୍ୟରୁ ୭ଜଣ ଛାତ୍ରୀ ବେହୋସ ହୋଇଯାଇଥିଲେ । ସେମାନେ ହେଲେ ବିଶେଶ୍ୱରୀ ମେହେର , ରାଖୀ କୁଅଁର , ପ୍ରିୟଙ୍କା ହନୁମାନ, ଗିତାଞ୍ଜଲି କାଲସାଏ , ଶ୍ରୀୟା ରଣା ,ଶ୍ରୃତି ସାହୁ, ସୁନାଞ୍ଜଳି ଦାସ । ପ୍ରଧାନଶିକ୍ଷକ ମିଟିଂ ପାଇଁ ବଲାଙ୍ଗୀର ଯାଇଥିବାରୁ ଅଧିକ ସୂଚନା ମିଳିପାରିନାହିଁ ।
