ନୂଆଦିଲ୍ଲୀ: ୨୦୨୧ ମସିହାରେ ଦେଶରେ ପେଟ୍ରୋଲ ଏବଂ ଡିଜେଲର ମୂଲ୍ୟ ବଢି ଚାଲିଛି । ଯଦି ଜାନୁଆରୀରୁ ବର୍ତ୍ତମାନ ପର୍ଯ୍ୟନ୍ତ ତୁଳନା କରାଯାଏ ତେବେ, ଏହି ସମୟ ମଧ୍ୟରେ ପେଟ୍ରୋଲର ମୂଲ୍ୟ ୧୮ ଟଙ୍କା ବୃଦ୍ଧି ପାଇଥିବାବେଳେ ଡିଜେଲ ମଧ୍ୟ ପ୍ରାୟ ୧୬ ଟଙ୍କା ବୃଦ୍ଧି ପାଇଛି । ଆଇଓସିଏଲ ତଥ୍ୟ ଅନୁଯାୟୀ, ଜାନୁଆରୀ ୧, ୨୦୨୧ ରେ, ଜାତୀୟ ରାଜଧାନୀ ଦିଲ୍ଲୀରେ ପେଟ୍ରୋଲର ମୂଲ୍ୟ ଲିଟର ପିଛା ୮୩.୭୧ ଟଙ୍କା ଥିଲା, ଯାହା ବର୍ତ୍ତମାନ ଜୁଲାଇ ୮, ୨୦୨୧ ରେ ଲିଟର ପିଛା ୧୦୦.୫୬ ଟଙ୍କା ରହିଛି । ଏହି ସମୟରେ, ଜାନୁଆରୀ ୧ ରେ ରାଜଧାନୀ ଦିଲ୍ଲୀରେ ଡିଜେଲ ଲିଟର ପିଛା ୭୩.୮୮ ଟଙ୍କା ଥିଲା ଯାହା ବର୍ତ୍ତମାନ ଲିଟର ପିଛା ୮୯.୬୨ ଟଙ୍କାକୁ ବୃଦ୍ଧି ପାଇଛି । ଅର୍ଥାତ୍ ପେଟ୍ରୋଲର ମୂଲ୍ୟ ପ୍ରତି ମାସରେ ହାରାହାରି ୩ ଟଙ୍କା ବୃଦ୍ଧି ପାଇଛି । ସେହିପରି ଡିଜେଲ ହାରାହାରି ଲିଟର ପିଛା ୨.୬୬ ଟଙ୍କା ବୃଦ୍ଧି ପାଇଛି । ଗତ ଦୁଇ ମାସ ମଧ୍ୟରେ ରାଜଧାନୀ ଦିଲ୍ଲୀରେ ତୈଳ ଦର ଦ୍ରୁତ ଗତିରେ ବୃଦ୍ଧି ପାଇଛି । ମେ ୪ ପରେ ପେଟ୍ରୋଲ ଦର ୩୮ ଦିନ ବୃଦ୍ଧି ପାଇଛି, ଯେଉଁ କାରଣରୁ ପେଟ୍ରୋଲ ୧୦.୨୪ ଟଙ୍କା ବ୍ୟୟବହୁଳ ହୋଇଛି । ଡିଜେଲ ମୂଲ୍ୟ ମୋଟ ୩୬ ଦିନ ବୃଦ୍ଧି ପାଇଛି ଏବଂ ଏହା ୮.୮୩ ଟଙ୍କା ବ୍ୟୟବହୁଳ ହୋଇଛି ।
